Şəki Xan Sarayının fotoşəkilləri internet saytına yerləşdirilib

Rusiya Beynəlxalq informasiya Agentliyi "RİA Novosti" özünün internet saytında Şəki xan sarayına aid 15 fotoşəkil yerləşdirmişdir.

Qeyd edək ki, şəkilaltı sözlərdə çoxsaylı xarici turistlərin XVIII əsrin 60-cı illərinə aid bu Azərbaycan memarlıq abidəsinə baxmaq üçün Şəkiyə səyahət etdikləri bildirilir. İnternet saytında o da bildirilir ki, ikimərtəbəli sarayın tikintisində memarlar bişmiş qırmızı kərpic və çay daşından, palıd və çinar ağaclarından istifadə etmişlər. Tikintidə bir ədəd də mismar işlədilməmişdir. İnşaatçıların yaratdığı xüsusi seysmik kəmər nəticəsində qədim Azərbaycan memarlarının bu möcüzəsi ən güclü zəlzələlərə belə davam gətirmişdir.

Xatırladaq ki, saytda Şəki xanı Hüseyn xan Müştaqın yay iqamətgahı olan bu sarayın 6 otaq, 4 dəhliz və 2 güzgülü eyvandan ibarət olduğu, ikinci mərtəbənin kişi və qadınlar üçün ayrıca iki hissəyə bölündüyü qeyd edilir. Buradakı suvaq üzərində rəngli naxışlar, otaqlardakı divar rəsmləri, ağacdan hazırlanmış və aralarındakı boşluqlara müxtəlif rəngli şüşə parçaları bənd edilmiş həndəsi naxışlı pəncərə şəbəkələri diqqəti cəlb edir. Şəbəkənin bir kvadratmetri 3 mindən 7 minədək hissədən ibarətdir.

Saraydakı divar rəsmləri müxtəlif dövrlərdə yaşamış rəssamlar tərəfindən işlənmişdir. Onların arasında ən tanınmışları Usta Abbasqulu və Usta Qənbər Qarabağidir. Divarlardakı təsvirlər bir-birini təkrarlamır. Bu təsvirlər nəbati ornament kompozisiyalarından, insan, quş rəsmlərindən, müharibə və ov səhnələrindən ibarətdir.

Səs.- 2008.- 16 fevral.- S. 16.