Aydınoğlu T.

Azərbaycan Turizm İnstitutunun iki yaşı tamam olur

Turizm sahəsində ixtisaslı kadrlara olan tələbatı ödəməklə Azərbaycanda daxili turizmin inkişafını dəstəkləmək məqsədi ilə Azərbaycan Respublikasının Prezidenti İlham Əliyevin sərəncamı və Nazirlər Kabinetinin müvafiq qərarı əsasında iki il əvvəl yaradılmış Azərbaycan Turizm İnstitutu iki yaşını qeyd edir. Bu münasibətlə ali təhsil ocağında keçirilmiş tədbirdə ötən ildə qazanılan uğurlardan danışılmış, iki ildən sonra Azərbaycan turizm sənayesinin yerli ixtisaslı kadrlarla təmin olunacağı vurğulanmışdır. Bildirilmişdir ki, tələbələrin beynəlxalq standartlara uyğun təhsil almaları üçün institutda hər cür şərait yaradılmışdır. Azərbaycanda ilk dəfə burada ikili diplom – həm ATİ, həm də Avstriyanın İMC Tətbiqi Elmlər Universitetinin diplomları veriləcəkdir. Avropa İttifaqının Erasmus-Mundus Mübadilə Proqramı çərçivəsində Fransa, Yunanıstan, Portuqaliya, Latviya, Niderland, Bolqarıstan, İtaliya kimi ölkələrin ali təhsil müəssisələri ilə tələbə və müəllim mübadiləsi həyata keçirilir. Arxada qalmış iki il ATİ üçün bir sıra respublika və beynəlxalq səviyyəli konfransların keçirilməsi ilə də əlamətdar olmuşdur. Ölkənin bu yeni ali məktəbi Tələbə Qəbulu üzrə Dövlət Komissiyasının müəyyən etdiyi ali məktəblərinin reytinqi sıralamasında üçüncü yerdədir.
Azərbaycan Turizm İnstitutunun rektoru, tarix elmləri namizədi, dosent Cəfər Cəfərov qəzetimiz üçün müsahibəsində bildirdi:
– ATİ dövlət təhsil sistemi standartına uyğun olaraq, Azərbaycan Respublikası Mədəniyyət və Turizm Nazirliyinin nəzdində yaradılmışdır. İnstitutun peşəkar məqsədi Azərbaycan turizm sənayesinin inkişaf etdirilməsi, qonaqpərvərlik, turizm, səyahət və istirahət sahəsində ixtisaslı kadrlara olan ehtiyacı ödəmək üçün mütəxəssislərin hazırlanması və təkmilləşdirilməsidir. ATİ ilk tədris fəaliyyətinə 2006-cı il sentyabr ayında turizm işinin təşkili və idarə edilməsi fakültəsinin üç ixtisası – menecment, marketinq, servis, turizm fənləri, ümumi fənlər kafedraları və 200 tələbə ilə başlandı. İkinci tədris ili üçünsə ATİ-nin tələbə qəbulu planına Nazirlər Kabineti tərəfindən təsdiq edilmiş beş yeni ixtisas – sanatoriya və kurort müəssisələrində tibbi xidmətin təşkili, sağlamlıq və kurort, mədəniyyət və incəsənət turizmi, linqvistika (bələdçi-tərcüməçi), idman turizmi əlavə edilmişdir. Tələbə qəbulu sayı isə 310 nəfərə qədər artırıldı. Hazırda ATİ-də 8 ixtisas üzrə 509 tələbə təhsil alır. Tələbələrin ictimai fəallığını dəstəkləmək üçün tələbə gənclər, həmkarlar təşkilatları, tələbə elmi cəmiyyəti və turist klubu kimi birliklər fəaliyyət göstərir. Hər ayın son çərşənbə günü müxtəlif mövzular ətrafında millət vəkilləri, səfirliklər, təşkilatlar və digər mötəbər qurumlardan olan qonaqların iştirakı ilə müzakirə klubu keçirilir.
İlk gündən ATİ öz işlərini Boloniya prosesi tələbləri əsasında qurmuşdur. Hər bir tələbəyə ayrıca fərdi-tədris planı hazırlanmışdır. Bu formada cari tədris ili ərzində keçiləcək fənlərlə yanaşı, tədrisin həftəlik saatlarının miqdarı və müəllim haqqında müəyyən məlumat öz əksini tapır. Birinci kurs istisna olmaqla, bu formanın doldurulması müstəqil surətdə tələbənin özünə həvalə edilir. Birinci kursa qəbul olan tələbələr üçün yaddaş və bələdçi mətnləri hazırlanmışdır. Ümumiyyətlə, Boloniya prosesi çərçivəsində kredit sisteminin tətbiqi, dəyərləndirmələrin kuizlərə, aralıq imtahanlarına və final imtahanlarına əsaslanması, tədris prosesinin təqdimat və müzakirələr əsasında keçirilməsi, mühazirə mətnlərinin əvvəlcədən tələbələrə paylanması, tələbələrə sərbəst müəllim və fənn seçmələri üçün müvafiq şəraitin yaradılması, onların “aşağıdan” və “yuxarıdan” fənn seçə bilmələri üçün hazırlanması uğurla həyata keçirilir. Hər bir tələbə üçün fərdi tədris planının hazırlanması, tələbələrin elmi araşdırmalara fəal cəlb edilməsi, elmi-praktik konfransların keçirilməsi və materialların nəşr edilməsi, turizm sahəsində digər ali məktəblərlə sıx əməkdaşlıq əlaqələrinin qurulması da ATİ-də tədrisin inkişaf etmiş ölkələr səviyyəsində və keyfiyyətində aparılmasına zəmin yaradır.

ATİ ötən iki ildə bir sıra yerli və beynəlxalq konfransların təşkilatçısı və iştirakçısı olmuşdur. Bunlara misal olaraq, “Turizm təhsilində problemlər və perspektivlər”, “Azərbaycan turizmi: bu gün və sabah”, və “Turizm və rekreasiya: problemlər və perspektivlər” respublika konfranslarını göstərmək olar.
Tarixdə “Qloballaşma prosesində Qafqaz və Mərkəzi Asiya” II Beynəlxalq Konqresi çərçivəsində ATİ əməkdaşları aktiv iştirak etmiş, ümumən turizm sessiyasının təşkilatçılığını həyata keçirmiş və Bakıda keçirilmiş “İKT-yə üzv ölkələrin iqtisadiyyatında turizmin rolu” adlı beynəlxalq elmi konfransın həm iştirakçısı, həm də həmsədri olmuşdur. Cari ildə də bu ənənə davam etdiriləcəkdir. Bu ilin mayında turizm sahəsində bakalavr dərəcəsində təhsil alan tələbələrin “Azərbaycan turizmi: bu gün və sabah” mövzusunda ikinci respublika elmi-praktik konfransı və beynəlxalq əməkdaş olan “İMC TEU Krems” ilə birgə “Hər mövsümdə Azərbaycan” adlı beynəlxalq konfrans təşkil etməyi planlaşdırmışıq. Konfransda Yaponiya, Tayland, Gürcüstan, Rusiya, Avstriya, Almaniya, Amerika və BMT ÜTT-dən turizmin müxtəlif növləri üzrə beynəlxalq mütəxəssislərin iştirak nəzərdə tutulur.
ATİ-də eyni zamanda, turizm sahəsində müxtəlif kitabların toplandığı ATİ Kitabxana İnformasiya Mərkəzi fəaliyyət göstərir. Respublikamızda turizm sahəsində bu cür zəngin yeganə mərkəzdən ATİ-nin kollektivi kimi, digər ali məktəblərin tələbələri, elmi işçilər də istifadə edirlər. Əsasən xarici ölkələrin nəşri olan bu kitablar Heydər Əliyev Fondu, AMEA, Azərbaycan Respublikası Mədəniyyət və Turizm Nazirliyi, Türkiyə Respublikası Boğaziçi Universiteti, ABŞ-ın Azərbaycandakı səfirliyi, BMT-nin Azərbaycan təmsilçiliyi, BMT, ÜTT, Bakı Səyahət və Ekskursiya Şurası, Avstriyanın İMC Tətbiqi Elmlər Universiteti kimi müxtəlif qurum və təşkilatlar tərəfindən bağışlanmışdır. İnstitutda elektron kitabxananın da yaradılması yönündə intensiv hazırlıq işləri gedir.
ATİ turizm sahəsinin yalnız təhsili ilə kifayətlənmir, eyni zamanda bu sahədə təlim və tədqiqat proseslərinin həyata keçirilməsində də yaxından iştirak edir. Bununla bağlı institutda ATİ Təlim Mərkəzi və ATİ Tədqiqat və İnkişaf şöbəsi fəaliyyət göstərir. Məhz bu struktur bölmələrinin dəstəyi ilə ATİ 2007-ci ilin son rübündə Almaniya Texniki Əməkdaşlıq Cəmiyyəti (GTZ) ilə “Lənkəran iqtisadi rayonun turizm potensialının tədqiqi” layihəsini uğurla həyata keçirmişdir. Layihə çərçivəsində Lənkəran rayonunun otel-restoran biznesi işçilərinə qısa müddətli təkmilləşdirmə təlim kursları verilmiş və rayonun potensial turizm imkanları araşdırılmış və bu yöndə müfəssəl hesabat hazırlanaraq GTZ-yə təqdim edilmişdir.
Sonda Cəfər müəllim dedi:
– ATİ cəmi iki illik fəaliyyəti dövründə gərəkliyini sübuta yetirmiş, dünyanın turizm sahəsindəki təcrübəli ali məktəbləri ilə ayaqlaşacaq səviyyədə inkişaf etmək üçün zəruri baza formalaşdırmışdır. Gələcək planlar isə çoxdur. İlk növbədə, ATİ-nin hər cür təchiz olunmuş korpusunun tikilməsi, 2008 – 2009-cu tədris ilindən etibarən magistratura mərhələsinin və kollecin yaradılması, mütəxəssislər üçün ixtisasartırma və ixtisasdəyişmə kurslarının təşkili, sertifikat proqramları kurslarının yaradılması, turizm sahəsində elmi-tədqiqatların və araşdırmaların daha da genişləndirilməsi və s.
Bütün səylərimiz ölkəmizdə turizmin elmi əsaslarla inkişafını sürətləndirəcək, onu gəlirli sahəyə, canlı təbliğat şəbəkəsinə çevirəcək kadrlar yetişdirməyə yönəldilib.

Xalq qəzeti.- 2008.- 13 fevral.- S. 4.