Mərkəzi Asiya və Qafqaz ölkələrində turizm" mövzusunda tədbir keçirilib

Fevralın 6-13 tarixlərində Yaponiyanın Tokio şəhərində Yaponiyanın Xarici İşlər Nazirliyi tərəfindən "Mərkəzi Asiya və Qafqaz ölkələrində turizm" mövzusunda keçirilmiş proqramda Azərbaycan Respublikasından da nümayəndə iştirak etmişdir. Ölkəmizi Mədəniyyət və Turizm Nazirliyinin turizm şöbəsinin böyük məsləhətçisi Səbinə Zadayeva təmsil edib.
Qeyd olunan tədbirdə Azərbaycanla yanaşı Gürcüstan, Ermənistan, Qazaxıstan, Qırğızıstan, Özbəkistan və Tacikistanın da dövlət qurumlarının nümayəndələri iştirak ediblər.
Proqramın əsas məqamı olan "Mərkəzi Asiya və Qafqazda turizm" adlı prezentasiya Yaponiyanın Turizm Agentliklərinin Assosiasiyası "SATA" və 25 turizm şirkətinin nümayəndələrinin iştirakı ilə keçirilmişdir. Nazirliyin əməkdaşı proqram çərçivəsində Azərbaycanın turizm potensialını əks etdirən prezentasiyanı iştirakçıların diqqətinə təqdim etmiş, Mədəniyyət və Turizm Nazirliyinin turizm sahəsində gördüyü işlər barədə məlumat vermiş və turist şirkətlərinin suallarını cavablandırmışdır. Həmçinin, Azərbaycanın turizm potensialını əks etdirən çap məhsulları turist şirkətlərinin nümayəndələrinə təqdimolunmuşdur.
Tədbir zamanı Tokio, Kioto və Hirosima şəhərlərinin görməli yerlərinə ekskursiyalar təşkil edilmiş və bu yerlərin turizm potensialı iştirakçılara nümayiş etdirilmişdir.
Proqram müddətində Yaponiyanın bir sıra tanınmış xadimləri, iş adamları və turizm mütəxəssisləri ilə görüşlər keçirilmişdir.
Seminarın sonunda bütün iştirakçılara sertifikatlar verilmişdir.

Səs.- 2008.- 23 fevral.- S. 12.