Azərbaycanlı rəssam Dəniz Qüvvələri Komandanlığının həyata keçirdiyi layihədə iştirak edir

İstanbuldakı Yedditəpə Universitetinin azərbaycanlı müəllimi Rafiq Əzizov Dəniz Qüvvələri Komandanlığının şəhərin Beşiktaş rayonundakı sərgi salonunda aparılan bərpa işlərində iştirak edir. Türkiyə bürosunun xəbərinə görə, köhnə əsərlərin təmiri ilə məşğul olan R.Əzizov Türkiyə Hərbi Dəniz Qüvvələrinin tarixini əks etdirən iri həcmli 5 ədəd yağlı boya tablosu da çəkib. Sərginin açılış tarixi qısa müddətdə müəyyənləşdiriləcək. Açılışdan sonra komandanlığın yeni muzey binasının təməli atılacaq. Rəssam R.Əzizov komandanlığın bundan sonra reallaşdıracağı layihələrin hamısında iştirak edəcək.

Qeyd edək ki, 1953-cü ildə Göyçay rayonunda anadan olan Rafiq Əzizov Əzim Əzimzadə adına Rəssamlıq Məktəbini və N.Tusi adına Pedaqoji Universiteti bitirib. 1992-ci ildən bəri Türkiyədə yaşayan rəssam ölkənin ən böyük özəl təhsil ocaqlarından biri olan Yedditəpə Universitetinin yaradıldığı 1996-cı ildən orada dərs deyir. İndiyədək Türkiyədə onun 15 fərdi sərgisi açılıb.

Səs.- 2008.- 16 fevral.- S. 16.