Mehdiyev M.
Məhz həmin mənzərəyə
görə 1946-cı
ildə Elbəyi Ə.Əzimzadə adına Rəssamlıq Məktəbinə imtahansız
qəbul etmişdilər.
Məşhur rəssam
Salam Salamzadə demişdir: "Ay oğul, sənin qiymətini ağlın, zəkan verib. Buyur keç, sən buranın tələbəsi oldun".
Səttar Bəhlulzadə
adına salonun direktoru Elçin Orucovun dedikləri: "Abşeronda əlvan gözəllik, təbiət
mənzərələri axtarmaq
əslində, çox
çətindir. Çünki
burada nə yaşıl meşələr,
nə uca dağlar, nə də bulaqlar var. Bura neft
buruqlarının ucaldığı,
bəzən susuzluqdan
cadar-cadar olmuş şoran torpaqlardır. Gərək rəssam Elbəy Rzaquliyev kimi fırça ustası olasan, bu torpağın gözəlliyini, füsunkarlığını duyasan ki, onu istedadının, sevginin, qədirbilənliyinin
süzgəcindən keçirib
seyrçi zövqünə
uyğun "Abşeron"
kimi monumental tablo yarada biləsən.
Ömrü boyu xoş arzularla yaşamış, Azərbaycanın
işıqlı sabahları
barədə düşünmüş
görkəmli fırça
ustası Elbəy
müəllim əsərlərində
əzəli və əbədi yurd yerlərimizi özü sevdiyindən bəlkə də artıq tamaşaçılara sevdirmişdir".
E.Rzaquliyev respublikamızın
bütün bölgələrində
olmuşdu. Onu ilk dəfə görənlər əsərlərinə
görə səmimi qarşılayırdılarsa, sonra
insani keyfiyyətlərinə
görə sevər, adını hörmətlə
çəkərdilər. O, sözün həqiqi mənasında, şəxsiyyət,
yaradıcı ziyalı
idi. Respublika Rəssamlar İttifaqında
böyük nüfuz,
hörmət sahibi idi. Neçə-neçə gəncin İttifaqa daxil olmasına zəmanət vermiş, emalatxana almasına qayğı göstərmişdi. Onun yaradıcılığında əsas mövzu Bakı, Abşeron idi. "Şirvanşahlar
sarayı", "İçərişəhər",
"Bakı kəndində",
"Mirzə Ələkbər
Sabir" əsərlərinə
indi də maraqla baxılır. Ustad sənətkar öz fırçası ilə
Azərbaycan təbiətinin
gözəlliyini incə
ştrixlərlə vermiş,
təsvir, tərənnüm
etmişdir.
1986-cı ildə Moskvada respublikamızın
təsviri sənət
ustalarının yaradıcılıq
günləri keçirilirdi.
Geniş, işıqlı
salonda 600-dən artıq sənət nümunəsi nümayiş
etdirilirdi. Sərgiyə
tənqidçi-ədəbiyyatşünas
Aydın Məmmədovla
birgə məşhur
şair-publisist Oljas Süleymenov da gəlmişdi. O, çox
əsərlərə maraqla,
diqqətlə baxdı.
Ancaq Elbəy Rzaquliyevin "Üzeyir Hacıbəyov dünyası"
portreti önündə
dəqiqələrlə dayanaraq
"Yaşa səni, sənətkar, dahiyə ikinci ömür vermisən" demişdi.
Elbəy
Rzaquliyev istedadlı kino rəssamı kimi də tanınmışdı.
O, 1953-cü ildə Ümumittifaq
Dövlət Kinematoqrafiya
İnstitutunun kino rəssamlığı fakültəsini
bitirdikdən sonra
"Azərbaycanfilm" kinostudiyasında
quruluşçu rəssam
kimi fəaliyyətə
başlamışdı. "Görüş", "Arxadan
vurulan zərbə",
"İstintaq davam edir". "Torpaq. Dəniz.Od. Səma" və bir çox tammetrajlı bədii filmlərə tərtibat vermişdi. "Ögey ana" filmində İsmayıl rolunun ifaçısı mərhum
Ceyhun Mirzəyev çəkiliş zamanını
kövrək hisslərlə
xatırlayaraq deyərdi:
"Uşaq yaşımda
mənə böyük
etimad göstərmişdilər.
Doğrudur, çoxlarından
qayğı görərdim.
Ancaq Elbəy müəllim mənə yerişi, duruşu, gülüşü, ögey
ana ilə münasibəti öyrətmişdi".
"Görüş" filminin
rejissoru Tofiq Tağızadə isə vaxtilə yazıb: "Elbəy gözəl sənətkar, həm də milli mənliyini,
şəxsiyyətini qoruyub
saxlayan insandır".
Ömrünün son vaxtlarında onun S.Bəhlulzadə adına sərgi salonunda fərdi sərgisi təşkil olunmuşdu. O, var gücü
ilə çalışırdı
ki, təsviri sənətimiz dünyada tanınsın. Əsərləri
bir çox sərgi salonlarının
daimi eksponatıdır.
30-dan artıq bədii
filmin quruluşçu
rəssamı olub. Əlbəttə, əməyi
də hədər getməyib. Xalq rəssamı fəxri adına, Dövlət mükafatına layiq görülüb. 1998-ci ildə
ulu öndər Heydər Əliyev onu "Şöhrət"
ordeni ilə təltif edib. Elbəy müəllimin ən böyük arzusu torpaqlarımızın
azad olunması idi. Təəssüf ki, onun bu
arzusu hələ çin olmayıb. İnanırıq ki, tezliklə ərazi bütövlüyümüz bərpa
olunacaq, mərhum rəssamın ruhu dinclik tapacaq. Özü isə heç vaxt unudulmayacaq, hörmətlə,
məhəbbətlə xatırlanacaq.
Azərbaycan.- 2007.- 8 fevral.- S. 8.