Mədəniyyət və Turizm Nazirliyinin iki yaşı

Mədəniyyət və Turizm Nazirliyinin yaranmasından 2 il ötür. Nazirlikdə son iki ildə görülmüş işlərlə bağlı mətbuat konfransı keçirilib. Mədəniyyət və Turizm naziri Əbülfəs Qarayev bildirib ki, prezident İlham Əliyevin 30 yanvar 2006-cı ildə imzaladığı sərəncamla Azərbaycan Respublikasının Mədəniyyət və Turizm Nazirliyi bir qurum kimi yenidən təşkil olunub. Azərbaycanda mədəniyyətin daha da çiçəklənməsi və inkişafı üçün əlindən gələni edəcəyinə söz verən Əbülfəs Qarayev bu işdə hamının kömək və dəstəyinə ehtiyacı olduğunu da bildirib: «Tək əldən səs çıxmaz, xalqının mədəniyyətini qorumağı bacaran dövlət yaşayır. Mədəniyyət və Turizm Nazirliyi işini qədim mədəniyyətimizin qorunub saxlanılması, çağdaş mədəniyyət və turizmin inkişaf etdirilməsi istiqamətində qurur».

Kitabxana, teatr, muzey, tarixi abidələrin qorunmasına dair proqramlardan, 2 il ərzində ad alan sənətçilərdən, mədəniyyət işçilərinə göstərdikləri qayğı və diqqətdən geniş və ətraflı danışan nazir gələcək planlardan da söz açıb. Planlar sırasına aşıq sənətinə diqqətin artırılması, 2009-cu ildə teatr festivalının Bakıda keçirilməsi, ənənəvi olaraq hər il 30 yanvar tarixdə televiziya və jurnalistika sahəsində xüsusi fərqlənənlərin mükafatlandırılması da daxil edilib.

Ədalət.- 2008.- 1 fevral.- S. 6.