Zümrüd

"Dağkəsəmən" Qazax xalısı

İndiyədək Kiyev İncəsənət muzeyində erməni xalısı kimi nümayiş olunan "Dağkəsəmən" Qazax xalısının XVIII əsr Qazax mədəniyyətinə aid olduğu sübuta yetirilib. Bu səhv Kiyev İncəsənət Muzeyində baş tutan sərgidə düzəldilib. Muzeydə Ukrayna, Azərbaycan, Rusiya və Polşadan olan ekspertlərin iştirakı ilə keçirilən elmi-praktik konfrans zamanı Azərbaycan xalçaçıları əsər üzərində olan ornamentlər vasitəsilə xalının, həqiqətən də, Azərbaycan xalqına aid olduğunu sübut edib.

Qeyd edək ki, Kiyevdə XVIII-XIX əsrə aid "Azərbaycan xalıları" adlı sərgidə 10 xalımız nümayiş olunub. "Qaraqaşlı", "Qaçağan", "Ləmpə" və Qazax xalçaçılıq məktəbinə aid olan "Şəddə" kimi xalılar sərgi izləyicilərinin böyük marağına səbəb olub. Azərbaycan Dövlət Xalçaçılıq və Xalq Tətbiqi Sənəti Muzeyinin direktoru Röya Tağıyevanın sözlərinə görə, onlar Kiyev İncəsənət Muzeyi ilə artıq bir ildir ki, əməkdaşhq edirlər: "Bu sərgi bizim üçün ona görə əhəmiyyətlidir ki, dünyada Azərbaycan xalçası ilk dəfədir ki, Azərbaycan xalçası kimi təqdim edilir. Bu günədək belə bir hadisə olmayıb. Adətən, bizim xalçalar Qafqaz xalçaları kimi təqdim edilirdi".

Qeyd edək ki, Kiyevdə keçirilən xalça sərgisi uzun müddət davam edəcək. Bununla kifayətlənməyən dövlət muzeyi əməkdaşları Moskva İncəsənət Muzeyi ilə də danışıqlar aparır. Bu ilin sonunadək Moskvada da Azərbaycan xalçaçılıq sənətini əks etdirən sərginin açılması nəzərdə tutulur.

Səs.- 2008.- 8 fevral.- S. 12.