Məhəbbətoğlu Q.

Sözsüz əsərləri ilə Azərbaycanı dünyaya tanıdan rəssam

Bu günlərdə İtaliyanın Moristika şəhərində dünyanın bir çox ölkəsindən yüzlərlə karikaturaçı rəssamın qatıldığı Beynəlxalq Karikatur Müsabiqəsində həmyerlimiz Seyran Cəfərlinin əsəri xüsusi mükafata layiq görülüb. Bu barədə qəzetimizə S.Cəfərli məlumat verib. Onun sözlərinə görə, bu onun 2008-ci ildə beynəlxalq yarışlarda əldə etdiyi üçüncü yüksək nəticədir. Belə ki, Seyran Cəfərlinin əsərləri 2008-ci ildə Çində keçiriləcək XXIX Yay Olimpiya oyunlarına həsr olunmuş VI Beynəlxalq Karikatur (Şanxay şəhərində) Müsabiqəsində xüsusi mükafata, I Beynəlxalq Qrafika və Yumor Festivalında (Argentina) isə 2 və 3-cü (birinci və ikinci bölmələr üzrə) yerlərə layiq görülüb. (Yeri gəlmişkən, qeyd edək ki, Çində keçirilən yarışmada Azərbaycan Karikaturaçı Rəssamlar Birliyinin sədri Bayram Hacızadənin də əsərinə xüsusi mükafat təqdim olunub).

Qazandığı son uğurları bu ilin aprel ayında ölkəmizdə ilk dəfə düzənlənəcək "Molla Nəsrəddin" Azərbaycan-2008 Beynəlxalq Karikatur Müsabiqəsinə töhfə kimi dəyərləndirən Seyran Cəfərlinin sözlərinə görə, son yeddi ildə o, beynəlxalq karikatur yarışmalarında 51 mükafat əldə edib. Azərbaycan karikatur sənətini layiqincə təmsil etməsindən qürur duyduğunu dilə gətirən həmsöhbətimiz hər bir uğurunu, hər bir nailiyyətini Azərbaycan mədəniyyətinin uğuru kimi dəyərləndirdi. Bildirdi ki, sözsüz, başqa sözlə desək, heç bir şərhə ehtiyacı olmayan əsərlər beynəlxalq karikatur yarışmalarının əsas tələbidir: "Bu mənada Azərbaycanı dünyaya "sözsüz" tanıtmaq, görünür, mənim qismətimə düşüb".

Ölkəmizdə hələ fərdi sərgi təşkil etməyə tələsmədiyini qeyd edən Seyran Cəfərli bir neçə beynəlxalq müsabiqəyə də əsərlərini təqdim etdiyini vurğulamaqla yanaşı, hazırda rəsmlərindən ibarət kitab üzərində işlədiyini söylədi. Dediyinə görə, bu il nəşri nəzərdə tutulan kitaba əsasən beynəlxalq yarışlara qatılan 70-dən çox əsərini daxil etmək niyyətindədir. Kitabda eyni zamanda tanınmış karikaturçu rəssamlar Marçen Bondarevski (Polşa), Rəhim Baqqal Əsgər (İran), Firuz Kutal (Norveç), Hüseyin Çaxmaq (QKTC) və digərlərinin Seyran Cəfərli barədə söylədikləri fikirlər də yer alacaq.

Zaman.- 2008.- 14-15 fevral.- S. 13.