Mükərrəmoğlu M.

Ötən iki il mədəniyyətimiz üçün də uğurlu olmuşdur

Mədəniyyət və Turizm Nazirliyinin yeni strukturda fəaliyyətə başlamasından keçən iki il ərzində ölkəmizin mədəni həyatı xeyli zənginləşdi. Mədəniyyət naziri Əbülfəs Qarayevin bu münasibətlə keçirdiyi toplantıda səslənən faktlar bunu bir daha təsdiq edir. 50 minlik kontingenti əhatə edən bu nazirliyin tabeliyində 6308 tarixi abidə, 28 teatr, 1 sirk, 12 konsert müəssisəsi, 4047 kitabxana, 3000-ə yaxın klub, 160 dövlət muzeyi, 260 uşaq musiqi, incəsənət və rəssamlıq mərkəzi, 34 rəsm qalereyası və sərgi salonu, 20 dövlət qoruğu, 61 mədəniyyət və istirahət parkı, 1 zoopark, 4 asudə vaxt mərkəzi və s. vardır. Ölkənin 7 şəhərində və 61 rayonunda mədəniyyət və turizm şöbələri fəaliyyət göstərir.

Mədəniyyət Nazirliyi möhtərəm Prezidentimizin ölkəmizin mədəniyyət və incəsənət xadimlərinin yubileyləri ilə bağlı sərəncamlarının icrasını yüksək səviyyədə həyata keçirmişdir. Hüseyn Cavid, Aşıq Şəmşir, İlyas Əfəndiyev, Fikrət Əmirov, Xəlil Rza, Üzeyir Hacıbəyov, Müslüm Maqomayev, Rəşid Behbudov və onlarla digər ədəbiyyat və incəsənət xadimlərinin yubileyləri təntənə ilə qeyd olunmuşdur.

Azərbaycan mədəniyyəti dünyada geniş təbliğ olunmuşdur. Bir sıra dövlətlərdə keçirilən Azərbaycan mədəniyyəti həftələri, mədəniyyət və incəsənət xadimləri ilə görüşlər milli-mənəvi dəyərlərimizin təbliği baxımdan çox əhəmiyyətli olmuşdur.

Bundan başqa, tarix və mədəniyyət abidələrimiz bərpa olunmuş, onların bəziləri tamamilə yenidən qurulmuşdur. Turizmin inkişafı üçün yeni imkanlar yaradılmışdır ki, bunu da turistlərin il-ildən artan sayı bir daha təsdiq edir.

Azərbaycanda kino, musiqi, rəssamlıq sənətlərinin yeni üslubda inkişafı təmin edilmişdir. "Salnamə" studiyası yaradılmış "Heydər Əliyevin irsi və Azərbaycan gəncliyi", çoxseriyalı sənədli fılminin istehsalına başlanmışdır. Yeni-yeni filmlər istehsal olunmuş, Eldar Quliyevin "Girov" filmi Karlovı-Vanda keçirilən Beynəlxalq kinofestivalda iştirak etmişdir.

Milli Məclisdə “Teatr haqqında”, “Mədəniyyət haqqında” qanunlar qəbul edilmişdir. Bütün bunlar mədəniyyətimizin hüquqi bazasının möhkəmləndirilməsində mühüm rol oynamışdır.

Azərbaycan muğamının qorunub saxlanılması istiqamətində Heydər Əliyev Fondunun prezidenti, millət vəkili Mehriban xanım Əliyevanın həyata keçirdiyi ardıcıl tədbirlər öz nəticəsini vermişdir.

Möhtərəm Prezidentimiz mədəniyyət və turizmlə bağlı 50-dən çox fərman və sərəncam imzalamışdır. Mədəniyyət və Turizm Nazirliyi milli-mənəvi dəyərlərimizin qorunub saxlanılması və gələcək nəsillərə ötürülməsi üçün bir sıra uğurlu tədbirlər həyata keçirmişdir.

M.Rostropoviçin xatirəsinə həsr olunmuş I Beynəlxalq Rostropoviç Festivalı ölkəmizin paytaxtını bir daha diqqət mərkəzinə çəkdi.

Teatrların, mədəniyyət müəssisələrmin, muzeylərin təmiri diqqət mərkəzində saxlanılır. Prezidentin sərəncamı ilə əsaslı təmir olunan Kukla Teatrı balaca tamaşaçıların ixtiyarına verilmişdir.

Çox maraqlı faktlardan biri İslam Konfransı Təşkilatının V konfransında Bakı şəhərinin 2009-cu ildə İslam mədəniyyətinin paytaxtı elan edilməsi oldu. Rusiyada, Belarusda, Moldovada Azərbaycan mədəniyyəti günləri böyük uğurla keçdi.

Müxtəlif beynəlxalq musiqi, teatr festivallarında Azərbaycanın incəsənət xadimlərinin qazandığı uğurlar milli mədəniyyətimizin inkişafının əyani sübutudur. Təkcə 2007-ci ildə 200-dən çox mədəniyyət və incəsənət xadimi möhtərəm Prezidentimizin sərəncamı ilə təltif olunmuşlar.

Bir-birinin ardınca incəsənətin müxtəlif sahələrinə dair möhtərəm Prezidentimizin imzaladığı sərəncamlar öz bəhrəsini verməkdədir. Kino, teatr, muzey işi, kitabxana və s. sahələrlə bağlı verilmiş sərəncamlar nazirliyin kollektivini daha da səfərbər etmiş, yeni nailiyyətlərə ruhlandırmışdır. Təkcə 2007-ci ildə ölkədə 19 yeni muzey yaradılmışdır.

Azərbaycan Respublikasının Prezidenti İlham Əliyevin yaxından köməkliyi, YUNESKO və İSESKO-nun xoşməramlı səfıri Mehriban xanım Əliyevanın dəstəyi ilə Qobustan Dövlət Tarixi-Bədii Qoruğu YUNESKO-nun Ümumdünya İrs Siyahısına daxil edilmişdir (29 iyul 2007-ci il).

Kino sənətinin inkişafı ilə bağlı Prezident sərəncamından sonra (23 fevral 2007) ölkədə kinematoqrafiya sahəsində yeni canlanma müşahidə olunmağa başladı. "Ev", "Qrinviç meridianı", "Nəfəs" bədii filmləri təhvil verilmişdir. Bundan başqa "Milli bomba", "Məhkumlar", "Biz qayıdacağıq": "Cavid ömrü" bədii filmlərinin premyerası keçirilmişdir.

Turizm sahəsində də uğurlar olmuşdur. Ölkəmiz bir neçə nüfuzlu beynəlxalq turizm sərgisində iştirak etmişdir. Ölkəmizə gələn xarici vətəndaşların sayı 1320.000 nəfər olmuşdur. Bu rəqəm 2002-ci illə müqayisədə 58 faiz çoxdur.

Göründüyü kimi nazirliyin yenidən təşkil edildiyi ötən iki ildə ölkəmizdə mənəvi dəyərlərin qorunub gələcək nəsillərə çatdırılması istiqamətində mühüm işlər görülmüşdür.

Xalq qəzeti. -2008.- 7 fevral.- S. 7.