Günay

Azəri rejissor türklərə cizgi filmi çəkməyi öyrədir

Azərbaycanlı rəssam və cizgi filmləri rejissoru Vahid Talıbın köməkliyi ilə Ankaradakı Qız Texniki Peşə institutunda "Qrafik animasiya və cizgi film şöbəsi" fəaliyyətə başlayıb. Bu iki illik kurslar öz maraqlı, illüziyaya bənzər dərsləri ilə diqqət çəkir.

Fakültənin dekanı Tanzer Özder türk nəşrlərinə açıqlamasında bildirir ki, məktəbin tələbələri birinci il rəssam kimi müxtəlif şəkil çəkir. İkinci il isə tələbələr həftədə 3 dəfə praktikada olur, 2 dəfə isə institutda dərslərini davam etdirirlər. Eyni zamanda Özder bildirir ki, institutda qədim türk sənəti ilə müasir türk sənətini birləşdirən qrafika və animasiya sahəsində mütəxəssisə ehtiyac var. Bunun üçün də bizim bu fakültədə dərs alan gənc tələbələrin iş problemi olmayacaq.

Kursların təşkilatçısı və aparıcı müəllimi olan azərbaycanlı rəssam və cizgi filmləri rejissoru Vahid Talıb 1972-ci ildə Azərbaycan Rəssamlıq Akademiyasını, 1976-cı ildə də Moskva Universitetinin Cizgi Film Rəssamlığı fakültəsini bitirib. 1983-93 illər arasında Azərbaycan Kino Təşkilatında 15 cizgi filmi və 5 sənədli filmdə rəssam, rejissor kimi çalışıb və beynəlxalq müsabiqələrdə bir çox mükafatlar qazanıb. Açdığı kurslarda fotoqraf, kamera, üç ölçülü cizgi filmlərinə aid təhsil verildiyini deyən Talıbın sözlərinə görə, məktəb hər cür texniki vəsaitə malikdir. Belə ki, yaratdıqları sayt vasitəsilə tələbələr cizgi filmi və qrafika sahəsində əldə etdikləri bilikləri aralarında paylaşacaq.

Paritet.- 2008.- 12-13 fevral.- S. 13.