"NTV-Kino" şirkəti Pirəküşküldə film çəkib

Aleksandr Çernyayev: "Azərbaycanlı aktyorlarla işləməkdən zövq aldım"

"Rejissor debütüm sayılan "Russkiy perevod" filminin bəzi səhnələrinin çəkilişi üçün Azərbaycanı seçməyimin bir neçə səbəbi var".

"NTV-Kino" şirkətinin baş direktoru Aleksandr Çernyayev filmdə əsas hadisələrin Yəməndə, qismən də Livanda baş verdiyini bildirib: "Çəkilişlər Pirəküşkül poliqonunda aparılıb və buranın landşaftı hadisələrin baş verdiyi yerə ideal dərəcədə uyğun gəlirdi. İkincisi, film Yəmən Respublikasında vətəndaş müharibəsi dövründə baş verən hadisələrdən bəhs edir və çəkilişlər üçün çoxlu sayda hərbi texnika və xüsusi obyektlər tələb olunurdu. Azərbaycanda bütün bunları bizim üçün təşkil edə bilərdilər. Ən əsası isə seçimimizdə əməkdaşlıq etdiyimiz insanlar böyük rol oynadı, buna görə onlara çoxlu təşəkkür edirəm. Onların köməyi olmadan bu cür miqyaslı film çəkmək mümkün olmazdı". Aleksandr Çernyayev filmdə rol alan azərbaycanlı aktyorlar Fuad Poladov, Fuad Osmanov, Firdovsi Atakişiyev və başqalarının peşəkarlığını yüksək qiymətləndirib: "Onların işini çox yüksək qiymətləndirirəm. Bunlar hələ köhnə məktəbin nümayəndələridir. Onlarla birgə işləməkdən zövq aldım". Aleksandr Çernyayev Azərbaycanla bağlı ən xoş təəssüratlarının olduğunu deyib: "Dediyim kimi, bizi çox yaxşı qarşıladılar, çəkiliş prosesinin təşkilatçılığı çox yüksək səviyyədə həyata keçirildi. Bakı və burada yaşayan insanların qonaqpərvərliyi çox xoşuma gəldi. Təbii ki, Azərbaycanın gözəl mətbəxini də yaddan çıxarmaq olmaz". O, yeni layihələr olacağı təqdirdə yenidən Azərbaycana gələ biləcəyini söyləyib. Aleksandr Çernyayev martın 6-da "Vse moqut koroli" tammetrajlı filminin ekranlarda nümayiş olunacağını deyib: "Bu lirik komediya məhəbbət və insan dəyərləri haqqındadır. Biz bu janrı "yüngül kino" adlandırırıq. Yeri gəlmişkən, filmdə əsas rollardan birini Jerar Depardye canlandırır. Yəni, biz artıq Avropanın kino ulduzları ilə işləməyə başlamışıq. Təbii ki, Hollivudla bağlı bəzi planlarımız var, amma hələlik bu layihə tam hazır olmadığına görə, əvvəlcədən bir şey söyləyə bilmərəm".

Səs.- 2008.- 21 fevral.- S. 16.