Ssenarilərin hazırlanması üzrə treninq keçirilib

Bu günlərdə Tbilisi şəhərində İFA-SC tərəfindən təşkil olunmuş "Cənubi Qafqaz filmlərinin proyekt və ssenarilərinin işlənib hazırlanması üzrə treninq" keçirilib. Treninqi məşhur ssenari müəllifi, "Bir dəfə Amerikada" filminin və digər məşhur bestsellerlərin işlənib hazırlanmasında iştirak etmiş Hlare Dovns və kinematoqrafiya sahəsində böyük şöhrətə malik olan prodüser Lusiano Hloor aparıb. Bu barədə "Kaspi"yə İFA-SC-ın Azərbaycandakı rəsmi nümayəndəsi "Nərimanfilm"dən məlumat verilib. Xəbərin davamında qeyd olunub ki, treninqdə həmçinin bir komanda kimi işləmək bacarığının vacibliyinə də toxunulub. Orada Azərbaycandan yazıçı Aleksandr Həkimov, VQİK-ın ssenari fakultəsinin tələbəsi Nərgiz Bağırzadə, Bakı Beynəlxalq Kino Məktəbinin tələbəsi Fariz Əhmədov, reyissor Vüqar Nağıyev, prodüser Leyla Dostəlizadə iştirak ediblər. Öyrəndik ki, treninqin ikinci seminarının mayın sonunda keçirilməsi planlaşdırılıb.

Kaspi.- 2008.- 26 fevral.- S. 17.