Əsilbəyli X.

Yazmaq istəmirəm

Sədaqət Arifqızı: Elə bil bir sədd var qarşımda

Musiqinin məqsədi qəlbləri riqqətə gətirməkdir. Poeziya isə ruhun musiqisidir. Və təbii ki, onlar hər ikisi vəhdət şəklində dərin mənaları ifadə edir. Səmimi olmayan musiqi isə yaşamaq qabiliyyətindən məhrumdur.

   Həmsöhbətimizin qəlbinin səsinə köklənmiş musiqilərdə böyük səmimiyyət var. Bəlkə ona görədir ki, hər biri yaddaşlarda həkk olunur, unudulmur. O, tanınmış bəstəkar Sədaqət Arifqızıdır.
   Haqqında qısaca: Fərəh və Fidan adlı 2 qızı, Elçin adlı 1 oğlu, 4 nəvəsi var. Londonda yaşayan qızlarının 1-i ailəlidir, digəri isə 12-ci sinifdə təhsil alır. Sədaqət xanım professor, filologiya elmləri doktoru, uzun illər Musiqi Akademiyasında kafedra müdiri olmuş Arif Məmmədovun qızıdır.
   Görüşərkən Sədaqət xanım əvvəlcə yaradıcılıq planları haqda söhbət açdı:
   - Nadir Qafarzadə ilə sözləri Nüsrət Kəsəmənliyə aid "Bir də geri qayıdarmı" adlı yeni bir mahnını lentə yazdıracağıq. Nadir Qafarzadənin ifasında səslənən, sözləri Zemfira Əlişqızına məxsus bəstələdiyim "Ana, mənim laylamı de" adlı mahnım isə 2007-ci ildə "İlin mahnısı" nominasiyasına layiq görüldü. Mahnılar çoxdur. 30 mahnım hazırda yazılıb. Əsas onları üzə çıxarmaqdır. Mən gənc, sənətə yeni başlayan bəstəkar deyiləm qapı döyüm. Artıq 30 ildir Musiqi Akademiyasının fortepiano kafedrasında baş müəllimə işləyirəm. Ucuz reklama ehtiyacım yoxdur.
   - Bayağı mahnılar çoxdur?
   - Çoxdur. Kompüter, sintezator vasitəsilə ritmə güc verirlər. Eyni tempdə, eyni ritmdə mahnılar yazılır. Buna görə də onlar bir-birinə oxşayır. Təbii ki, belə mahnıların da öz dinləyiciləri var. Lakin yaşlı, orta nəsli də nəzərə almaq lazımdır. Lirik, həzin, insana ruh verən mahnılar da ifa olunmalıdır. Mənim də ritmik mahnılarım var. Baba Vəziroğlunun sözlərinə bəstələdiyim "İcazə ver, qoy çıxım gedim" mahnısı ritmikdir və çox bəyənilir.
   Sənətdə paxıllıq yox, rəqabət olar. Bunu normal qəbul edirəm. Amma zərbə vurmağa çalışmaq lazım deyil. Xanım İsmayılqızı, Novruz Aslanov kimi gözəl bəstəkarlarımız var ki, onların musiqilərini böyük zövqlə dinləyirəm. Yaxşı əsərə necə pis demək olar? 30 ilə yaxındır professional musiqiçiyəm. Heç vaxt nəyinsə xətrinə yazmamışam. Mən müğənnini özüm seçirəm. Onun üslubunu, səsini, istedadını yoxlayıb, sonra mahnı təqdim edirəm. Pulu olub oxuya bilməyənə mahnı verməmişəm. Mən Musiqi Akademiyasında dahi bəstəkarlarla çiyin-çiyinə işləyirəm. Pul qazanmaq xətrinə mahnı yazmış olsam, ən azı, onlardan utanaram.
   - Qalmaqaldan uzaq olub şou-biznes aləmində baş verənləri seyr etmək çətin deyil ki?..
   - Təbii ki, çətindir. Sadəcə, baş verənlərə əhəmiyyət verməməyə çalışıram. Ən əsası odur ki mən öz yolumla gedirəm. İndi özünə bəstəkar deyən çoxdur. Təsəvvür edin ki, 15-20 dəqiqəyə mahnı yazan "bəstəkarlar" var. Bütün bunları müşahidə edəndə əsəbiləşirəm. Hər halda, bədii şura yaradılmalıdır və yazılan mahnılar da, ifaçılar da ələkdən keçməlidir.
   - Sədaqət xanım dinləyicilərinə nə söz verir?
   - Mahnılarım çoxdur. Hər yazdığım mahnı kafedramızda fəaliyyət göstərən 35 müəllim tərəfindən dinlənilib qəbul olunur. Sadəcə, yazdıqlarımın taleyi gətirməyəndə təsirlənirəm. Yazmaq istəmirəm. Elə bil bir sədd var qarşımda. Səbəbini də başa düşmürəm bu durğunluğun...

Həftə içi.- 2008.- 14 fevral.- S. 8.