Zabit
Nəbizadə: ""Səs Qarabağda yetişir"
deyənlər Azərbaycanı parçalamaq
istəyirlər"
Bu yaxınlarda başa çatan "Muğam"
müsabiqəsində ikinci yerə layiq görülən
Abgül Mirzəliyevi hamı "muğam sənətində
yeni səs tapıntısı" adlandırdı. Bunu münsiflər
heyətinin üzvləri
də təsdiqləsələr
də, onun ifasını böyük
ləzzətlə dinləmələrini
söyləsələr də,
müsabiqənin keçirildiyi
Rəşid Behbudov adına Mahnı Teatrının salonuna yığışan tamaşaçıların
onu ayaq üstə alqışlamalarına baxmayaraq, "düzgün yolla" oxumadığına görə
hər dəfə danlanırdı. Və buna görə onun müəllimini qınayırdılar. Biz isə
müsabiqənin gedişatında
Abgülü hazırlaşdıran,
hazırda da Asəf Zeynallı adına Musiqi Kollecində ona xanəndəlik sənətinin
sirlərini öyrədən
tanınmış xanəndə,
əməkdar artist Zabit Nəbizadə ilə söhbətimizdə
bunlara aydınlıq gətirməyə çalışdıq.
- Zabit müəllim, bu günlərdə başa çatan "Muğam" televiziya müsabiqəsinin qalibləri
arasında sizin tələbəniz Abgül
Mirzəliyev də var. Təəssüratlarınızı öyrənmək maraqlı olardı.
- Sözün düzü,
Bakıya gələnədək
mənim o uşaqdan xəbərim olmayıb. Çünki o, Şamaxı Musiqi Kollecində təhsil alırdı. Onun müsabiqədəki çıxışlarını isə mən hazırlamışam.
- Bildiyimə görə,
Abgül sizin həmkəndlinizdir...
- Bəli, tanımağına
tanıyırdım. Şamaxıdakı
Musiqi Kollecinə də mən onu qəbul etdirmişdim. Amma müsabiqəyədək onun
hansı səviyyədə
təhsil almasından
xəbərim olmayıb.
Müsabiqədəki repertuarını
isə mən hazırlamışam.
- Bu günlərdə
belə bir məlumat yayıldı ki, Güllü Muradova ilə Abgülü "Leyli və Məcnun" operasında Leyli və Məcnun rollarında sınamaq istəyirlər...
- Bu barədə ilk dəfə mənə zəng ediblər və Abgülü də özüm Opera və Balet Teatrına
aparmışam. Təbii
ki, Abgülə birdən-birə Məcnun rolunu verməzlər. Teatrın
direktoru Akif müəllimlə söhbətimizdə
də dedim ki, Abgülün Məcnun rolunda səhnəyə çıxması
hələ tezdir, muğamların da hamısını öyrənməyib.
Akif müəllim dedi ki, Abgüllə
Güllünün Məcnun
və Leyli rolunda səhnəyə çıxmalarına həm
xarici görünüşləri,
həm səsləri,
həm də yaşları tam uyğun gəlir. Mənim bildiyimə görə, onları ciddi şəkildə bu rollara hazırlayacaqlar.
- "Muğam" müsabiqəsinin
münsiflər heyəti
Abgülü "Muğam
sənətində yeni
tapıntı" adlandırdı...
- Çoxları muğamı
Qarabağla bağlayır
və "Xanəndə
Qarabağda doğulur,
Bakıda püxtələşir"
deyirlər. Bu, Azərbaycanı parçalamaq
istəyənlərin sözüdür.
Başa düşmürəm,
"səs Qarabağda
yetişir" deyənlər
nə demək istəyirlər? Bu düzgün fikir deyil. Mənə Şirvan bölgəsindən
bir xanəndə göstərin ki, səsi zil olmayıb.
Bu gün Abgülü "muğam
sənətində yeni
tapıntı" adlandıranlar
bir vaxtlar mənim haqqımda da belə deyirdilər.
Sonralar məni bir neçə il "bala Alim"
deyə çağırırdılar.
Doğrudur, o vaxtlar mənə "bala Alim" deyiləndə, qürrələnirdim,
amma indi fikirləşirəm ki, belə şeylər gəncləri öz yolundan sapdıra bilər. Abgülün səsinə gəldikdə,
onu deyə bilərəm ki, heç kimin səsindən artıq səs deyil. Abgül mənim həmkəndlim olsa da, tələbəmdir, bir pedaqoq kimi
onun indi bu qədər şişirdilməsinin əleyhinəyəm.
Bəli, Abgülün
səsi müsabiqənin
digər iştirakçılarının
səsindən seçilirdi.
Amma Abgül xaricdən gəlməyib ki, azərbaycanlıdır
da... Mən onunla da razılaşıram
ki, Abgül məhz səsinin hesabına ikinci yeri götürdü. Müsabiqədən sonra bir çox tamaşaçılar mənə
zəng edib dedilər ki, Abgül birinci yerə layiq idi. Mən bu
fikirlə də razılaşmıram. Çünki
münsiflər heyətində
bizim ustadlar əyləşmişdilər və
bu sahədə onlar tükü-tükdən seçməyi
adi tamaşaçıdan
gözəl bacarırlar.
Abgülün elə çıxışları oldu
ki, mən fikirləşdim onu daha müsabiqədə saxlamazlar...
- Abgülü Alim Qasımov kimi oxuduğuna görə də çox qınadılar...
- Alim Qasımovun adını heç kim çəkməsə
də, üstü örtülü desələr
də, bunu aydın başa düşmək olurdu. Mənə elə gəlir ki, bu, qısqanclığın
əlamətidir. Doğrudur,
Əlibaba müəllim
tez-tez deyirdi ki, "müəllimin səni düzgün öyrətməyib..." Sonradan
bu barədə Əlibaba müəllimlə
söhbət edəndə,
dedi ki, "mən onun Şamaxıdakı
müəllimini nəzərdə
tutub demişəm".
Amma mən yenə də Əlibaba müəllimin Abgülə Alim Qasımov kimi oxuduğuna görə
"sən düz yolda deyilsən" deməyi ilə razılaşmıram.
- Bir vaxtlar siz də müsabiqədən
keçib "Leyli və Məcnun" operasında Məcnun roluna təsdiq olunmuşdunuz. Amma sizi səhnədə çox az gördük...
- Sözün düzü,
o vaxt Opera
və Balet Teatrına getməyə mənim həvəsim olmayıb. Amma adını çəkməyəcəyim
bir nəfər məni ora dəvət
etmişdi, sözündən
çıxmayıb getdim.
Cəmi 4 ay işlədim. Sonra məni oradan xaric etdilər, dedilər ki, "hələlik bizə lazım deyilsiniz, lazım olanda, özümüz sizə xəbər verəcəyik".
Görünür, onlara
hələ də lazım deyiləm.
Ekspress.-2008.- 9-11 fevral.- S. 15.