Qadir T.

Rüstəm Zeynalov bu kitaba bacısının da adının yazılacağına inanır

Bu gün Azərbaycanın gənc istedadlarının “Qızıl kitab”ın səhifələrini vərəqləyəcəyik. Xatırladaq ki, sözügedən kitabda ölkə başçısının sərəncamına əsasən musiqi sahəsində xüsusi istedadı ilə fərqlənən uşaqların adı yer alıb. Kitabın səhifələrində dövlət başçısının xüsusi aylıq təqaüdünə layiq görülən Bakı şəhər 4 saylı Uşaq Musiqi Məktəbinin şagirdi Rüstəm Zeynalovun da adı var.

Rüstəm 1995-ci il yanvar ayının 20-i Bakı şəhərində mühəndis ailəsində dünyaya gəlib.

Ailənin ilk övladı hər zaman özündən balaca olan bacısına örnək olmağa çalışıb. Hazırda birinci sinif şagirdi olan bacısı Leylanın musiqiyə böyük marağı var. O da fortepiano şöbəsində oxuyur. Rüstəmin musiqiyə olan həvəsi ona nənəsindən keçib. Deyir ki, həmişə tətildə Balakənə gedəndə nənəm mənə həm rayonun milli mahnılarını, həm də xalq mahnılarımızı oxuyardı. Balakəndə yaşayan yaxın qohumlarının qızlarının da pianoda ifa etdikləri mahnılar onda pianoçu olmaq arzusunu doğururdu. Balacalıqdan pianoçuların ifalarının dinləməyi xoşlayan Rüstəm anasından musiqiyə olan istəyini gizlətmir. Anası Mehparə xanım da oğlunun incsənətə olan marağının görüb arzusunu reallaşdırır. 7 yaşlı Rüstəmi 4 saylı musiqi məktəbində fortepiano şöbəsinə yazdırır. Nənəsinin ona hər zaman xalq mahnıları oxumasına baxmayaraq Rüstəm vokal sahəsini deyil, ifaçılığı seçir. Bu da Rüstəmin mahnı bəstələmək eşqindən irəli gəlirdi. Fortepiano sinfinə ilk qədəmlərini qoyanda Rüstəm not bilməsə də, himnimizin notlarını yığaraq pianoda ifa edib. Bu da müəllimlərinin təəccübünə səbəb olub. Artıq müəllimləri bilirdi ki, not bilmədən kiçicik bir uşağın belə bir əsəri ifa etməsi onun böyük istedadının göstəricisidir. Hansısa bir musiqini böyük ustalıqla pianoda ifa etmək üçün o əsəri bircə dəfə eşitmək Rüstəm üçün kifayətdir.

Hazırda Rüstəm 72 saylı orta məktəbdə oxuyur. Anası Mehparə xanım isə Rüstəmin oxuduğu məktəbdə rus dili müəlliməsidir. Gənc pianoçu musiqi ilə yanaşı, digər sahələrə də maraq göstərir. Demək olar ki, bütün fənnlərə marağı var. Ən çox sevdiyi fənn isə coğrafiya, fizika, biologiya və riyaziyyatdır. Daha çox təbiət elmlərinə maraq göstərdiyini söyləyən Rüstəm dünyanı və kainatda baş verən hər bir hadisəni özü-özlüyündə analiz etməyə, öyrənməyə çalışdığını deyir. Musiqiyə olan sevgisinin məktəbdə onu sinif yoldaşlarından geri salmasını isə qəti istəmir. Bunun üçün də məşqlər ilə dərslərini paralel apararaq hər ikisində uğur qazanmaq üçün səy göstərir. Rüstəm bütün fənləri sevərək mənimsəsə də, ən böyük amalı yalnız musiqi sahəsində birinci olmaqdır.  Ali təhsilini də bu sahədə almaq niyyətindədir.  Üstəlik hələ violançel sinfində də təhsil almaq arzusundadır.  Orta məktəbi bitirib, Bülbül adına Orta İxtisas Musiqi Məktəbində fortepiano ilə paralel olaraq violançel sinfində oxumağı da düşünür. Boş vaxtı olanda isə Rüstəm velosiped sürməyi, dostları ilə yarışmağı xoşlayır. Üzgüçülüklə məşğul olur. Deyirlər, Rüstəm suya girdi elə bil dəryaya balıq salırlar. Özü isə futbolda güclü olmağı arzulayır. Di gəl ki, hər sahədə hamıdan birinci olmağa çalışan Rüstəm burda zəfidir. Hətta qol vuranda da dostları təəccüblənir ki, Rüstəm səndən nə əcəb? Fikrimcə, Rüstəm unikal bir oğlandır, hər sahəyə maraq göstərir. Hansı sahədə olursa olsun, əgər qarşısına məqsəd qoyubsa, istəyinə mütləq nail olur. Təki nəyi və niyə istədiyini bilsin, istəyi də ürəyincə olsun. Anası deyir ki, həyətə çıxan kimi musiqidən uzaqlaşır, sanki heç bu sahədən xəbəri yoxdur. Sinifdə də belədir, sanki yenə də musiqidən bixəbərdir. Bunun yaxşı və ya pis xüsusiyyət olduğunu deyə bilmərik, amma ən vacibi odur ki, Rüstəm onu əhatə edən mühitdə heç kimdən geri qalmaq istəmir. Musiqiçi ailəsində böyüyən uşaqlar gün ərzində valideynlərinin ifasında klassik əsərləri dinləyərək bu sahəyə meyilli, eyni zamanda məlumatlı olurlar. Rüstəm üçün isə bu baxımdan bir qədər çətin olub. Çünki, o yalnız musiqi məktəbinə gedəndən sonra klassik musiqi eşidib. Bacısı Leyla üçün isə musiqi ilə məşğul olmaq çətin deyil. Çünki, artıq onun örnək götürə biləcəyi Rüstəm kimi qardaşı var. Özündən altı yaş balaca olan bacısı Leylanı böyütməkdə anasına ən böyük köməyi elə Rüstəm edib. Mehparə xanım deyir ki, sağ olsun Rüstəm mənim əlimdən tutub. Bacısının adının Leyla olmasını da elə Rüstəm özü istəyib. Bir dəfə anası Rüstəmdən soruşur ki, “Rüstəm əgər bir gün dənizdə mən, atan və Leyla batarsa, sənin də bir nəfəri çıxarmaq şansın olsa, sən kimin həyatını xilas edərsən”?. Rüstəm düşünmədən Leylanın adını çəkir. Deyir siz böyüksünüz özünüzü birtəhər xilas edə bilərsiniz, axı, Leyla balaca və köməksizdir.

Dostları çoxdur, hamısı ilə xoş münasibət qurmağa çalışır. Amma onlarla bir araya gəlməyə vaxtı qalmır. 

Klassik bəstəkarlardan Motsart və Bethovenin əsərlərini çox sevir. Mosartın əsərlərinin şən, Bethovenin isə fəlsəfi düşüncəyə əsaslandığını deyən Rüstəm hər iki bəstəkarın sənətindən vəhdət örnək aldığını söyləyir. Özünə daha çox Bethoven və Baxı yaxın bilir. Şən mahnıları ifa edərkən musiqinin ritminin sanki hiss etmədiyini deyir. Bir əsəri ifa edərkən dərinliyinə varıb, qarşısına çıxan hər bir problemi çözməyə çalışır, daha çox ciddi melodiyalara meyl göstərir. Beynində fırlanan mahnıları nota almağı isə xoşlamadığından hələ elə bir bəstəsi yoxdur. Azərbaycan klassik musiqisinin yaradıcılarından Üzeyir Hacıbəyov, Qara Qarayev və Fikrət Əmirovun yaradıcılığının vurğunudur. Klassik musiqinin sirlərini və zənginliyini aşılayan ilk müəlliməsi isə Cənnət Matkazina olub.

İlk dəfə Qara Qarayev adına gənc pianoçuların 3-cü Bakı müsabiqəsində diplomat adı alıb. Həmin müsabiqədə ən gənc iştirakçı olaraq Rüstəmə fəxri fərman da təsis edilib. Musiqi Akademiyasının nəzdində fəaliyyət göstərən Məktəb Studiyasının 25 illik yubileyi münasibəti ilə keçirilən müsabiqə-festivalda və 4-cü  Qara Qarayev adına gənc pianoçuların Bakı müsabiqəsində Qran Pri mükafatına layiq görülür.  Moskva Dostları Qarşılayır Festivalının Qala Konsertdə uğurla çıxış edib. Qazağıstanda keçirilən  4-cü Beynəlxalq Gənclər Delfi oyunları müsabiqəsində peşəkarlığa görə xüsusi diploma layiq görülüb.

O valideyinlərindən asılı olmağı sevmir, müstəqildir. Öz işini özü görmək, problemləri ilə özü üzləşib çözmək istəyir. İki dəfə bir-birinin ardınca Qran Pri alması Rüstəmi xüsusi istedadlılar sırasına salınmasına bir təkan oldu. Prezident təqaüdünə layiq görülməsi haqqında xəbəri ilk olaraq qonşularından eşidib. Xoş xəbəri eşidəndə ilk reaksiyası piano arxasına keçməkdən ibarət olub. Rüstəm deyir ki, əgər bu vaxta kimi musiqi sahəsindən uzaqlaşmağa bir istəyi olsaydı belə, dövlət başçısının ona olan diqqət və qayğısından sonra bu addımı atması mümkün deyil. Artıq onun yolu və istiqaməti bəllidir. Şübhəsiz ki, gözəl pianoçu olaraq dünya səhnələrində uğurlu çıxışlar üçün can atır. Hər dəfə səhnəyə çıxmazdan əvvəl anasının xeyir-duasını aldığını deyən Rüstəm hər ifasından öncə böyük həyəcan yaşayır. Bu da Rüstəmin sənətinə məsuliyyətlə yanaşmasından irəli gəlir. Ən qəribə cəhəti isə təvazökar olmasıdır. Həmyaşıdlarından seçilməyi, öyünməyi qəti sevmir. Birinci yerdə tək durmaqdansa, ikinci sırada kiminləsə durmağa daha çox üstünlük verir. Ona elə gəlir ki, bacısı Leyla da nə vaxtsa onun qazandığı uğurlara çatacaq.

Yeni Azərbaycan.- 2008.- 19 fevral.- S. 8.