Qadir T.

Səhnəyə yaraşan oğlan

Zəngin musiqi ənənələrinə sahib olan Azərbaycan xalqı bacarıqlı gəncləri ilə hər zaman əcnəbilərin maraq dairəsində olub. Son vaxtlar yeni istedadların üzə çıxarılması məqsədilə müxtəlif müsabiqələr keçirilir. İstedadlı insani sərvətləri ilə zəngin olan bu dövlət hər zaman bacarıqlı gəncləri ilə qürrələnib. Sahəsindən və tutduğu peşədən asılı olmayaraq dövrün gəncləri arasında bu gün də istedadlılar çoxdur. Belə bacarıqlı uşaqlar ölkə rəhbərliyinin də diqqət mərkəzindədir. Ötənlərdə dövlət başçısının gənc istedadların xüsusi təqaüdə layiq görülməsi haqda imzaladığı sərəncam bunun bariz nümunəsidir. Xatırladaq ki, sərəncama əsasən musiqi sahəsində xüsusi istedadı ilə fərqlənənlərin adı Azərbaycanın gənc istedadlarının “Qızıl kitabı”na yazılıb. Dövlət başçısının xüsusi aylıq təqaüdünə layiq görülən istedadlardan biri də Bülbül adına Orta İxtisas Musiqi Məktəbinin 7-ci sinif şagirdi Vaqif Nağıyevdir.

Vaqif sərəncamda adı çəkilən istedadlılar sırasında yeganə vokal ifaçıdır. 1995-ci ildə may ayının 7-də Bakı şəhərində anadan olub. Balca oğlunun səhnəyə və musiqiyə olan həvəsini nəzərə alan İradə xanım Vaqifi 3 yaşı olanda xalq artsti Oqtay Zülfüqarovun yaratdığı “Aysel” ansamblında oxumağa aparıb. Anası İradə xanım Vaqifin artıq 7 aylığından danışmağa cəhd göstərdiyini deyir. Bir çox uşaqlar kimi Vaqifin də ilk sözü ana olub.

İradə xanım Paşayeva Bülbül adına Orta İxtisas Musiqi Məktəbində ibtidai sinif müəlliməsidir. Atası Vahid Nağıyev isə ixtisasca stomatoloqdur. Amma Vahid bəy bir vaxtlar Əvsər Cavanşirovun ansamblında oxuyub. İradə xanım Vaqifi musiqi sədaları altında yatızdırarmış, daha çox klassik əsərlər dinlədərmiş. İradə xanıma ən yaxın dost olan və uşaqlıqdan oxumağa can atan Vaqif teatr və kinoteatra gedəndə anasından onu səhnəyə çıxmağa icazə verməsini xahiş edirmiş. Kiçik yaşlarında Murad Nasırov və Filip Kirkorovun ifalarını dinləyər, kasetlərini yığarmış. Vaqif türk mahnılarına da biganə olmayıb. Balaca Vaqif evlərində səhnə düzəldib çıxışlar edər, səhnəciklər qurar, yaxınlarını öz tamaşaçısına çevirərmiş. Artıq 5 yaşı olanda Vaqif yazıb-oxumağı bacarırdı. Balaca Vaqif anasından ayrılmadan Bülbül adına Orta İxtisas Musiqi Məktəbində birinci sinfə, fortepiano şöbəsinə gedir. Fortepianoda ifa edəcəyi əsərləri anası ilə elə yolda ikən notları əzbərdən söyləyərək təkrar edərmiş. İlk müəllimi bəstəkar İlham Abdullayev olub. Onun məsləhəti ilə sonradan Vaqifi vokal sinfinə keçirirlər. Beləcə balaca vokalçının oxumaq istəyi fortepianoya olan həvəsi üstələyir. Hər zaman fəal olan Vaqif həmyaşıdları arasında elə ilk addımlarından öz istedadı ilə seçilir və bütün tədbirlərdə səhnə alır. Səhnə üçün doğulan Vaqif duruşu və baxışı, hətta təbəssümü ilə də bu fikri bir daha təsdiq edir. Vaqif görkəmli sənətkar Rəşid Behbudovun vurğunu olduğunu gizlətmir. Ölməz sənətkarın ifasında Tofiq Quliyev, Rauf Hacıyev, Emin Sabitoğlu kimi bəstəkarların mahnılarını dəfələrlə dinləməkdən usanmır. Vaqif bir çox bayramlarda Təbəssüm Uşaq Ansamblında çıxışlar edir.

Hələ 5-ci sinifdə oxuyarkən Bülbül adına Orta İxtisas Musiqi Məktəbi tərəfindən Kövkəb Səfərəliyev adına gənc ifaçıların IV festivalında müvəffəqiyyətli çıxışına görə tərifnamə ilə təltif olunub. “İstedadlar” 11 illik Bakı Uşaq Musiqi məktəblərinin seçilmiş şagirdləri sırasına daxil olunan Vaqif gözəl vokalçı sertifikatı ilə də təltif olunub. Bu ilin mayında keçirilən “Gül Bayramı”nda Musiqi proqramı bölməsinin “ən yaxşı mahnı ifaçısı” nominasiyası üzrə Bakı şəhər İcra Hakimiyyəti tərəfindən 3-cü dərəcəli diploma layiq görülüb.

Bir dəfə mədəniyyət və turizm naziri Sevda xanım Məmmədəliyevanın təşəbbüsü ilə məktəbdə bacarıqlı uşaqlar arasında seçim aparılıb. Hər şey bundan sonra başlayır. Sonradan bu hadisə Vaqifin həyatında bir yeni səhifə açır. Bir neçə məktəb yoldaşı ilə seçilən Vaqif Bakı Caz Mərkəzində keçirilən məşqlərə dəvət alır. Nə üçün və hansı konsertə hazırlaşdığını bilmədən Vaqif bir ay anası ilə birgə məşqlərə gedir.

2006-cı ilin noyabrında Vaqif Amerikaya gedəcəkləri haqqında xəbər eşidir. Anası üçün bu gözlənilməz olur. Vaqif üç yaşında olarkən valideyinləri ayrıldığından İradə xanım bircə dəfə də olsa, Vaqifdən uzaq qalmamışdı. Öz eqoizmi ucbatından Vaqifin yoluna sədd çəkmək istəməyən İradə xanım Vaqifin Amerikaya getməsinə razılaşır. Balaca vokalçı Amerikada olduğu bir həftə ərzində İradə xanım özünə yer tapa bilmir. Vaqif anasına zəng vurur, İradə xanımın səsi titrəsə də, oğlunun narahat olmaması üçün büruzə vermir. Dönəndə isə Vaqifin anasına ünvanladığı ilk sualı “Heç mənsiz darıxmırdın?” olur. Vaqif anasına pul lazım olduğunu bildiyi üçün Amerikada uşaqlara gündəlik xərclər üçün verilən pulları xərcləmir, özü ilə evə gətirir. Amerika səfərindən sonra həmin ilin dekabrında Dünya Azərbaycanlılarının Həmrəylik günü münasibətilə Moskvada dövlət tədbirləridə çıxış edən Vaqifi anası bu dəfə tək buraxmır.

Vaqif olduqca mehriban və dostlarına qarşı qayğıkeşdir. Rəqs etməyi çox sevir. Böyük səhnələrə can atan Vaqif bir vaxtlar məşhur italyan tenoru Luçano Pavarottini dinləsə də, son zamanlar daha çox Maykl Ceksona qulas asır. Onun kimi rəqs etməyə çalışır. Müəllimləri Vaqifdə artistlik qabiliyyətinin də çox olduğunu söyləyir. Dostları onu Bakının Qalkini adlandırır. Maksim Qalkin kimi məhşur aktyor və müğənniləri təqlid etməkdən zövq alır. Və bu Vaqifdə heç də pis alınmır. Hobbisi kaset və disk yığmaqdan ibarətdir. Dərslərində musiqi ilə bağlı olan fənlərə - musiqi ədəbiyyatı və solfeciyaya daha çox maraq göstərir. Ədəbiyyata marağı bir başqadır, Sergey Yeseninin əsərlərini oxumağa üstünlük verir. Çox gözəl təşkilatçılıq qabiliyyəti var. Sənətini peşəkar surətdə davam etdirmək niyyətində olan Vaqif ilk mərhələdə Milli Konservatoriyada ali təhsil almaq istəyir. Daha sonra vokal sənətinin sirlərinə Moskva və ya İtaliyada yiyələnmək arzusundadır. Vaqifin səs imkanlarını bəyənən və yüksək qiymət verən müəllimləri onun gələcəkdə məşhur opera müğənnisi olacağına ümid edirlər.

Yeni Azərbaycan.- 2008.- 5 fevral.- S. 8.