Böyük bəstəkarımız Qara Qarayev bu gün də bizimlədir

AzərTAc xəbər verir ki, fevralın 12-də Azərbaycan Dövlət Film Fondunun və Dövlət Mədəniyyət və İncəsənət Universitetinin birgə təşkilatçılığı ilə "Nizami" kinoteatrında böyük bəstəkarımız, SSRİ xalq artisti, dövlət mükafatları laureatı, Sosialist Əməyi Qəhrəmanı Qara Qarayevin anadan olmasının 90 illiyinə həsr edilmiş tədbir keçirilmişdir.
Tədbirdən əvvəl iştirakçılar Q.Qarayevin həyat və yaradıcılığının əks olunduğu müxtəlif arxivlərdən yeni tapılmış fotoşəkillərdən ibarət stendə baxmış və həmin fotoları videoçarx vasitəsilə seyr etmişlər.
Fondun direktoru, əməkdar incəsənət xadimi Cəmil Quliyev tədbirin ssenarisi ilə iştirakçıları tanış etmiş, xalq artisti, kinorejissor Oqtay Mirqasımovun 1968-ci ildə lentə alınmış və Qara Qarayevə həsr etdiyi "Bu həqiqətin səsidir" sənədli filminin məziyyətlərindən danışmışdır.
Bəstəkarlar ittifaqının məsul katibi, sənətşünaslıq namizədi Lalə Hüseynova öz ölməz yaradıcılığı ilə bu gün də aramızda olan bəstəkarın kino musiqisindən söz açmışdır. Bildirmişdir ki, bir çox janr və mövzularda dəyərli əsərlər yaradan Q.Qarayev kinofilmlərə yazdığı musiqilərə də olduqca həssas və məsuliyyətlə yanaşmışdır. "Bir məhəlləli iki oğlan", "Don Kixot", "Uzaq sahillərdə", "Qızıl eşalon", "Əsl dost", "Leyli və Məcnun", "Qanun naminə", "Qoyya və ya dərketmənin çətin yolu" (Fərəc Qarayevlə birgə) və sair bədii filmlərə yazdığı musiqilər əsl sənətkarlıq nümunələridir.
Dövlət Mədəniyyət və İncəsənət Universitetinin prorektoru, professor Rafiq Sadıxov, kinoşünas, əməkdar incəsənət xadimi Aydın Kazımzadə, kinorejissor Oqtay Mirqasımov və başqaları tədbirdə çıxış edərək Qara Qarayevin həyat yoluna nəzər salmış, onun yaradıcılığının müxtəlif məqamlarından danışmışlar.
Axırda O.Mirqasımovun "Bu həqiqətin səsidir" sənədli filmi nümayiş etdirilmişdir.

Azərbaycan.- 2008.-13 fevral.- S. 6.