Səlimqızı C.

“Yeddi gözəl”ə tədarük

Fərəc Qarayevin atasıyla bağlı arzusu reallaşacaq

«Mən istəmirəm atamın ev-muzeyi yaradılsın, amma arzu edirəm ki, Qara Qarayevin əsərləri - «Yeddi gözəl» və «İldırımlı yollarla» baletləri Akademik Opera və Balet Teatrında yenidən səhnələşdirilsin».

Xatırladaq ki, bu sözləri Qara Qarayevin oğlu Fərəc Qarayev APA agentliyinə bildirmişdi.

Bəs dahi bəstəkarın oğlunun arzusunu sözügedən teatrda necə qarşılayıblar? Teatrın mətbuat xidmətinin rəhbəri Şükufə Ağamirzəyeva hər zaman rəhbərliyin Qara Qarayev yaradıcılığını diqqətdə saxladığını bildirdi: «Qara Qarayev dünya-şöhrətli bəstəkardır və onun yaradıcılığı teatrın rəhbərliyinin daim diqqətindədir. Elə bu diqqətin nəticəsidir ki, dahi bəstəkarın yubileyi münasibətilə onun iki - «Leyli və Məcnun», «Don Kixot» birpərdəli baletini tamaşaçılara təqdim edəcəyik. Qara Qarayevin yubileyi fevralın 5-də oldu. Amma onun 90 illiyi ilboyu qeyd olunacaq». Mətbuat xidmətinin rəhbəri qeyd etdi ki, teatrın yaradıcı heyəti yaxın gələcəkdə bəstəkarın «Yeddi gözəl» monumental sənət nümunəsini səhnələşdirəcək. Artıq hazırlıq işlərinə başlandığını deyən Ş.Ağamirzəyeva baletin yeni quruluşda, yeni səhnə dekorasiyaları, səhnə geyimləriylə təqdim olunacağını söylədi. Tamaşa ilin sonunadək klassik musiqisevərlərin ixtiyarına veriləcək. Baletin quruluşçu rejissoru kim olacaq, əsas rollarda hansı sənətçilər çıxış edəcək, bütün bu suallara yaxın günlərdə baletin hazırlıq işləri yekunlaşandan sonra aydınlıq gətiriləcək. Öyrəndik ki, «Yeddi gözəl» təhfil veriləndən sonra «İldırımlı yollarla» baleti də səhnə həllini tapacaq. Xatırladaq ki, ilk dəfə 1960-cı illərdə səhnəyə qpyulan «Yeddi gözəl» və «İldırımlı yollarla» baleti uzun zaman Opera Teatrının repertuarını bəzəyib.

Mərkəz.- 2008.- 9 fevral.- S. 11.