Sadıqzadə H.

 

Muğam ustası ilə görüş


Azərbaycan muğam sənətinin ustadları, söz-sənət xiridarları və tanınmış incəsənət xadimləri fevralın 20-də bir araya gəldilər. Toplaşdılar ki, Azərbaycan muğam sənətinin inkişafında böyük xidmətləri olan Azərbaycanın xalq artisti, Şöhrət İstiqlal ordenli, professor Arif İmran oğlu Babayevin 70 illik yubileyini qeyd etsinlər. Yubiley tədbiri Azərbaycan Milli Konservatoriyası tərkibində Respublika İncəsənət Gimnaziyasının akt zalında keçirildi. Yubiley tədbirini giriş sözü ilə Azərbaycan Milli Konservatoriyasının rektoru, respublikanın xalq artisti, professor Səyavuş Kərimi açaraq Arif Babayevin milli musiqimizin inkişafı sahəsindəki xidmətlərindən danışdı. S.Kərimi daha sonra onun yetirmələrindən, bəstələdiyi mahnılardan, pedaqoji fəaliyyətindən, habelə yüksək insani məziyyətlərindən söz açdı.
Tədbirdə görkəmli muğam ustadının yetirmələri Zabit Nəbizadə (əməkdar artist), Aygün Bayramova (xalq artisti), Gülüstan Əliyeva (əməkdar artist), Nəzakət Teymurova (xalq artisti) onun repertuarından muğamlar oxudular.

Gimnaziyanın şagirdləri Gülcahan Məmmədova, Şəbnəm Mütəllimzadə, Aynur Əmirova, Əlimurad Nuriyev başqaları qiraət sahəsində bacarıqlarını nümayiş etdirdilər.
Sözü gedən tədris ocağı xoreoqrafiya şöbəsi şagirdlərinin çıxışları rəğbətlə qarşılandı. Yubiley tədbirini aparıcılar Mahmud Abdullahı Mənzər Məlikməmmədova təqdim etdilər.
Yubiley təntənəsinin sonunda görkəmli muğam ustası A. Babayev səhnəyə dəvət olundu. Respublika İncəsənət Gimnaziyasının direktoru Mahizər Şabanbəyova direktor müavini Kəmalə Kərimova yubilyar haqqında öz ürək sözlərini söyləyib hədiyyələri təqdim etdilər.


Ədəbiyyat qəzeti.- 2008.- 22 fevral.- S. 6.