"Uğurlarımı damla-damla qazanmışam"

Arif Babayevin 70 yaşı qeyd ediləcək

Fevralm 20-i xalq artisti, professor Arif Babayevin ad günüdür - 70 yaşı tamam olur. Qarabağ torpağının çoxsaylı istedadlarından olan, hələ cavanlıq illərində Xan Şuşinski, Zülfü Adıgözəlov, Mütəllim Mütəllimov, Seyid Şuşinski sənətindən bəhrələnib, muğamın sirlərinə yiyələnən sevimli xanəndəmizin doğum günü dövlətin diqqətindən kənarda qalmayıb.

Belə ki, sənətkarın yubiley mərasimi martın 12-də Azərbaycan Dövlət Akademik Opera və Balet Teatrında keçiriləcək. Mərasimdə tanınmış sənət adamlarının iştirakı ilə konsert proqramı izləniləcək. Həmçinin Arif Babayevin həyat və yaradıcılığından bəhs edən kino-kadrlar nümayiş olunacaq. Teatrın foyesində isə onun müxtəlif illərdə səhnədə çəkilən fotoşəkilləri sərgilənəcək. Qeyd edək ki, bu sərgini Azərbaycan Dövlət Musiqi Mədəniyyəti Muzeyi hazırlayacaq.

70 yaşlı sənətçi bizimlə söhbətində özünü bəxti gətirən sənətkar hesab etdiyini dedi: "Xanəndələr arasında ilk professor adını qazanan mən olmuşam. Xalq artistiyəm, daim dövlətin qayğısını üzərimdə hiss edirəm. Kənardan baxan üçün bunlar asan görünməsin. Bütün uğurlarımı damla-damla qazanmışam. Muğam sənətinə həvəsim uşaq yaşlarımdan başlayıb. Elə o vaxtdan sənətin çətin və asan tərəflərini görmüşəm. Ömrümün təxminən 40 ilini Opera və Balet Teatrında çalışmışam. Onun 30 ilini sərasər əsas rollarda oynamışam".

Arif Babayev söhbətinin sonunda onun yubileyinin təşkilində əməyi olan hər bir insana öncədən təşəkkür etdi.

Mədəniyyət.- 2008.- 15 fevral.- S. 16.