Eldar Mansurov: Azərbaycanda estrada musiqisi ifaçılığı ağır vəziyyətdədir

 

Azərbaycan Bəstəkarlar İttifaqının katibi, Əməkdar incəsənət xadimi, bəstəkar Eldar Mansurovun APA-ya müsahibəsi

 

- Azərbaycan musiqi sənətinin hazırkı durumunu necə xarakterizə edərdiniz?

 - Bu gün Azərbaycan mədəniyyətinə baxanda ürəyimdən ağrı keçir. Biz Şövkət Ələkbərovanın, Rəşid Behbudovun adını çəkəndə cavanlar əsəbiləşirlər. Yaxşı, onlar qaldı dünəndə, bəs bu gün? Dünən gənc olan Aygün Kazımova, Faiq Ağayev bu gün ortayaşlı musiqiçilər sırasındadır. İndi "azəri-starlar", "yeni-ulduzlar", "akademiyaçılar" həddindən artıq çoxdur. Bəs onlar sabah bizə verəcəklər? Azərbaycan mədəniyyətinin bugününü yeni doğulan uşağa bənzədirəm. Bəlkə sabah mən həyatda olmayanda bunların hansısa addımı, uğuru olacaq, amma bu gün hələ heç etmirlər. Bu gün Azərbaycanda estrada musiqisi ifaçılığı ağır vəziyyətdədir. İndi şou-biznes var. Şou-biznes isə bazardır, prodüserlər, aparıcılar, şoumenlər, yaxud da musiqidən başı çıxmayanların toplaşdığı bazar.

- Bu gün Eldar Mansurovun məktəbi varmı?

- Gənc ifaçılar mahnılarımı oxuyanlar mənim məktəbimdir. Gənclərlə işləyəndə mahnılarımı onlara havayı vermişəm, bu gün elədir. Ətrafıma bir çox gənc toplaşıb. Onlar məni yazmağa məcbur edirlər. Arada dincəlmək istəyirəm, ancaq hey mənə mahnı yazdırırlar. Bundan böyük xoşbəxtlik ola bilər? Hesab edirəm ki, ifaçıların simasında mənim məktəbim var. Bəstəkar kimi isə çətindir.

- Sizin bəzi mahnılarınız türk ifaçıları tərəfindən anonim bəstələr kimi ifa olunur. Buna münasibətiniz necədir?

- Hələ heç bir türk müğənnisi mahnımı mənim icazəmlə oxumayıb. Onlar orada yaşayır, mən burada. Bu səbəbdən isə edə, onları məhkəməyə verə bilmirəm. Dəfələrlə istəmişəm, amma gücüm çatmayıb. Əgər dövlət tərəfindən yaxşı vəkil verilsə, bu məhkəməni başlaya uda bilərəm.

- Müəlliflik hüququnuzun pozulduğu bu mahnıları dinləyəndə hansı hissləri keçirirsiniz?

- Qürur hissi keçirirəm. Bir azərbaycanlı kimi mənim əsərimin, Azərbaycan musiqisinin başqa ölkələrdə səslənməsi həm özümün, həm millətimin qələbəsidir. Əgər onlar bu bəstələrə müraciət edirlərsə, deməli, bu, dəyərli musiqidir. Mənim üçün pul maraqlı deyil. Burada qazanıram, acından ölmürəm ki... Məni yandıran Azərbaycan müəlliflərinin hüquqlarının qorunmamasıdır. Məhz bu səbəbdən məni xaricdə bütün millətlərin nümayəndəsi kimi qələmə verirlər, təkcə Azərbaycandan başqa. Bir çox vəkil tanışımın olmasına baxmayaraq, biri mənə demir ki, Eldar, sənədləri ver, aparaq sənin mahnıların səslənən ölkədə bu məsələni birdəfəlik həll edək. Bunu etmədiyimizə görə ermənilər bizim mahnıları götürürlər. Fikirləşirlər ki, əşi, bunlar öz musiqilərinə yiyə dura bilmirlər, biz onların musiqisini götürüb öz adımıza çıxaq. Məsəl var ki, yeməyənin payını yeyərlər.

- Sizcə, bu sahədə hansı konkret addımlar atılmalıdır?

- Bunun üçün hər şeydən əvvəl azərbaycanlı olmaq və azərbaycanlı olmağınla fəxr etmək lazımdır. Sözümüzü sənətimizlə, musiqimizlə deməliyik.

 - SMS-li müsabiqələrə münasibətiniz necədir?

- Bunu qəbul etmirəm. SMS-lə sənətkar seçməzlər.

- Opera yazmaq fikriniz yoxdur ki?

- Artıq "Yeddi gözəl" adlı rok-opera yazmışam, şərait gözləyirəm. Mənə bu operanı Musiqili Komediya Teatrında səhnəyə qoymaq təklif olunub. Amma bu oranın işi deyil. Heydər Əliyev adına Sarayın əsaslı təmiri başa çatandan sonra operanı səhnələşdirməyi düşünürəm. Eyni zamanda, bu işə sponsor köməyi lazımdır. Görək necə olacaq... Bir Bakıda Rok Mərkəzi yaratmaq istəyirəm. Bakıda Muğam, Caz Mərkəzi var, Rok Mərkəzi olsun. Bu, bilavasitə Bakıda rok musiqisinin inkişafına yardım edəcək. Çox istərdim ki, Bakıda rok musiqisi festivalı da keçirilsin.

- Bu gün yazılıb ifa olunan mahnıların tez unudulması nə ilə bağlıdır?

- Tofiq Quliyev, Cahangir Cahangirov, Rauf Hacıyev, Fikrət Əmirov ölməz mahnılar yaradıblar. Mən onların adının yanında çəkinə-çəkinə deyirəm ki, bəstəkaram. İndi kimdəsə səhv tutanda deyir ki, sən kimsən? Bunun səbəbi odur ki, indiki mahnılar sponsorun 5 min dolları ilə 5 dəfə efirdə gedir, pul qurtarandan sonra mahnı yaddan çıxır. Yaxşı musiqi isə yaddan çıxmamalıdır...

 

525-ci qəzet.- 2008.- 2 fevral.- S. 25.