Azərbaycan beynəlxalq mahnı müsabiqəsində iştirak etməyə hazırdır

AzərTAc xəbər verir ki, bu sözləri fevralın 1-də İctimai Televiziya və Radio Yayımları Şirkətində (İTV) Azərbaycanda "Avroviziya mahnı müsabiqəsi - 2008"in seçim turuna həsr edilmiş mətbuat konfransında Eurovision TV-nin baş direktoru Biorn Eriçsen demişdir.
İlk dəfə Azərbaycanda olduğunu bildirən B.Eriçsen demişdir ki, "Avroviziya" mahnı müsabiqəsi dünya miqyasında tanınmış müasir televiziya məhsuludur. Müsabiqənin şərtinə uyğun olaraq, burada Avropa Yayımlar Birliyinin (AYB) fəal üzvü olan televiziyaların təmsil olunduğu ölkənin iştirakçıları musiqi nömrələri ilə yarışırlar. Azərbaycan ilk dəfə olaraq bu yarışmada iştirak edəcəkdir.
Biorn Eriçsen vurğulamışdır ki, Belqradda keçiriləcək müsabiqəyə 43 ölkəni təmsil edən ifaçılar qatılacaqlar. Burada iştirak edən hər bir müğənni seçdiyi mahnının musiqisinə xüsusi diqqət yetirməlidir. Mayın 24-də keçiriləcək final yarışmasında ifaçıların sayca çoxluğuna baxmayaraq, bir nəfər qalib adını qazanacaq və onun təmsil olunduğu ölkə növbəti ildə bu müsabiqəyə ev sahibliyi edəcəkdir.
Eurovision TV-nin baş direktoru demişdir ki, müsabiqənin qalibi təkcə Avropada deyil, bütün dünyada tanınacaq və onun üçün bütün TV-lərin qapıları açıq olacaqdır.
Müsabiqədə Azərbaycan nümayəndə heyətinə rəhbərlik edəcək İTV-nin xarici əlaqələr şöbəsinin müdiri Adil Kərimli bildirmişdir ki, şərtlərə uyğun olaraq mahnı yarışmasında səslənəcək musiqi heç bir yerdə ifa edilməməlidir. Bu səbəbdən də müsabiqədə səslənəcək musiqi ilə bağlı yerli bəstəkarlara müraciət edilmiş və bu istiqamətdə iş aparılır.
İfaçılar - Aynur İsgəndərli, Elnur Hüseynov və "Unformal" qrupunun üzvləri bildirmişlər ki, fevralın 2-də keçiriləcək seçim turuna həsr edilmiş gecədə milli və xarici musiqilər səslənəcəkdir.
Milli seçim fevralın 2-də Heydər Əliyev adına İdman-Konsert Kompleksində qalibin adının elan olunması ilə başa çatacaqdır. Finalçıların konsert proqramı dünyanın bir çox ölkələrində canlı yayımlanacaq və gecədə tanınmış sənət adamları ilə yanaşı, müxtəlif illərdə "Avroviziya" mahnı müsabiqəsinin qalibi olmuş ifaçılar da iştirak edəcəklər.
Konsertdə beynəlxalq mahnı müsabiqəsinin qalibi, ukraynalı müğənni Ruslananın "wild energy" adlı şousunun təqdimatı olacaqdır. Konsertdən hazırlanan informasiya və videoçarx eurovision.tv saytında yerləşdiriləcəkdir. Gecədə Azərbaycanı "Avroviziya mahnı müsabiqəsi - 2008"də təmsil edəcək ifaçının adı məlum olacaqdır.

Azərbaycan.- 2008.- 2 fevral.- S. 3.