Aleksandr Şarovski: “Mənim təltif olunmağım bir daha sübut edir ki, Azərbaycandakı yəhudilər öz peşəkar qabiliyyətini reallaşdırmaq üçün hər cür imkana malikdirlər”

Yəhudi Xəbərlər Agentliyi (AEN) Azərbaycan Prezidenti İlham Əliyevin bu yaxınlarda imzaladığı sərəncamla Səməd Vurğun adına Azərbaycan Dövlət Rus Dram Teatrının baş rejissoru Aleksandr Şarovskinin "Şöhrət" ordeni ilə təltif edilməsi ilə bağlı məlumat yaymışdır.

Bakı aşkenazi yəhudiləri icmasının idarə heyətində AEN-ə bildirmişlər ki, "Şöhrət" ordeninin adının mənasında olan - məşhurluq, populyarlıq kimi anlayışlar Azərbaycanın xalq artisti Aleksandr Şarovskinin yaradıcılıq uğurlarını, ölkəmizin çoxmillətli mədəniyyətinin inkişafına verdiyi töhfələri çox gözəl səciyyələndirir. AEN agentliyinin məlumatında deyilir: "Aleksandr Yakovleviç Azərbaycan Rus Dram Teatrının "qızıl fondu"na daxil olmuş neçə-neçə tamaşaya quruluş vermişdir. Azərbaycandan olan yəhudi rejissorun işləri ilə A.İvanov adına Odessa Rus Dram Teatrının, Moskva Miniatür Teatrının və Rostov Dram Teatrının sənətsevərləri də yaxşı tanışdırlar. Müstəqil Dövlətlər Birliyinin televiziya tamaşaçıları Alensandr Şarovskini həm də Azərbaycanın - bəlkə də ən yaxşı bədii televiziya filmi sayılan, quruluşçu rejissoru əslən bakılı Yuli Qusman olan "Qorxma, mən səninləyəm" filmində baş rollardan birini ifa etmiş aktyor kimi də yaxşı tanıyırlar".

"Şöhrət" ordenli, Azərbaycan Teatr Xadimləri İttifaqının "Qızıl dərviş" mükafatı laureatı Aleksandr Şarovski Yəhudi Xəbərlər Agentliyinə müsahibəsində demişdir: "Möhtərəm Prezident İlham Əliyev məni "Şöhrət" ordeni kimi yüksək dövlət mükafatına layiq gördüyü üçün hədsiz xoşbəxtəm və onunla fəxr edirəm. Mən bu təltifı Səməd Vurğun adına Azərbaycan Dövlət Rus Dram Teatrının bütün kollektivi ilə bölüşürəm. Bu, mübahisə doğurmayan bir faktı bir daha təsdiq edir ki, Azərbaycan xalqının ümummilli lideri Heydər Əliyevin və onun layiqli varisi Prezident İlham Əliyevin siyasi xətti sayəsində Azərbaycandakı yəhudilər öz peşəkar qabiliyyətini reallaşdırmaq üçün hər cür imkana malikdirlər".

Xalq qəzeti.- 2008.-12 fevral.- S. 5.