Məhərrəmova T.

Mütəllim Dəmirov, xanəndə:İmkan versələr..

Alim Qasımovun tələbəsi sağlam rəqabətə hazırdır

Xanəndə kimi tanınmağına görə, özünü Alim Qasımova borclu bilir. Deyir ki, gözəl səsi, istedadı olsa da, sənət aləminin qapılarını məhz bu böyük sənətkar onun üzünə açıb. Elə uşaqlıqdan bu görkəmli xanəndənin yanında böyüyüb. Onun şirin zəngulələrini, gözəl oxumalarını eşidib. Eşitdikcə musiqiyə, xanəndə olmağa həvəsi daha da çoxalıb. Alim Qasımovun yolu ilə getməyə çalışsa da, ona oxşamağa çalışmayıb. Sənət aləmində öz izinin olmasını istəyib. Düzdür, əvvəlcə uşaq təxəyyülü onu aldadıb. Elə bilib ki, gözəl səsi varsa, demək, özünə sənət aləmində asan yer tapacaq. Ancaq sənət yolunda çoxlu maneələrlə qarşılaşanda hər şeyin onun düşündüyü qədər asan olmadığını dərk edib.

Yenə də bu qarışıqlıqda Alim Qasımov köməyinə çatıb.

Yaxşısı budur, hər şeyi Opera və Balet Teatrının solisti Mütəllim Dəmirovun öz dilindən eşidək:

- Alim Qasımovun tələbəsi olmağınız təsadüf idimi?

- Biz əslən Şamaxıdan olsaq da, mən Bakıda anadan olmuşam. Atamın gözəl səsi olub. O, vaxtilə Asəf Zeynallı adına texnikuma daxil olub. Atam rəhmətlik aşıq Şakirlə xanəndə kimi toylara oxumağa gedib. Ancaq ehtiyac üzündən sənətini davam etdirə bilməyib. Ailə həyatı qurduqdan sonra çətinlik çəkdiyi üçün sürücü işləməyə başlayıb. O, arzusuna çatmadığı üçün mənim xanəndə olmağımı istəyirdi. Onun ürəyində qalan arzusunu mən gerçəkləşdirdim. Buna görə atam çox sevindi. Amma sonradan onun sənət aləmində qarşılaşdığı çətinlikləri mən də yaşadım. Düzdür, müəyyən yerlərdə Alim Qasımovla qohumluğumuz dadıma çatdı. Mən uşaqlıqdan onun yanında böyüyüb, dərs almışam. O, səsimin yararlı olduğunu görüb mənə kömək etdi. Asəf Zeynallı adına musiqi texnikumuna get-gəl etsəm də, əvvəlcə daxil ola bilmədim. Hərbi xidmətə yollandım. Qayıdandan sonra nagüman halda yenidən qəbula gəldim. Xanəndə Nəriman Əliyev dedi ki, bala, göydə quş olub uçsan da xeyri yoxdur, pul verməsən, qəbul ola bilməzsən. Dedim ki, mənim pulum yoxdur, istəyirsiniz qəbul edin, istəyirsiniz etməyin. Mən quyunun dibində də olsam, oradan çıxacağam. Bəziləri başa düşür ki, yaxşı səsi batırmaq olmaz. Ona mütləq kömək eləmək lazımdır. Bəzisi üçünsə bunun heç bir əhəmiyyəti yoxdur. Mən də belə problemlə qarşılaşdığım üçün məcbur qalıb pul yığmaqdan ötrü dəmiryolu idarəsində fəhlə işləməyə başladım. Bəlkə bu yolla vəziyyətdən çıxış yolu tapa biləcəyimi güman edirdim.

- Çıxış yolu tapa bildinizmi?

- Fəhləliklə nə qədər pul qazanmaq olar ki? Ailəmiz də 10 nəfərdən ibarət idi. Çox çətinliklə dolanırdıq. Qazandığım pul dolanışığa güclə çatırdı. Ona görə bu yolla pul qazanmaq mümkün olmadı. Sonra Alim Qasımovun köməyi ilə texnikuma, daha sonra müsabiqə yolu ilə Opera Teatrına qəbul olundum. Ona görə ömür boyu Alim Qasımova minnətdaram. Ümumiyyətlə, insan ona kömək edənin yaxşılığını heç vaxt unutmamalıdır.

- Siz 1995-ci ildə Füzulinin 500 illiyi ilə əlaqədar keçirilən xanəndələrin respublika müsabiqəsinin laureatı olmusunuz. Bu qalibiyyət sizə yol aça bilmədimi?

- Texnikuma qəbul olunmağımın bir səbəbi də 1995-ci ildə Füzulinin 500 illiyi ilə əlaqədar keçirilən xanəndələrin respublika müsabiqəsində I yer tutmağım oldu. O müsabiqənin münsiflər heyətində Arif Babayev, Canəli Əkbərov, Tükəzban İsmayılova, Fəxrəddin Dadaşov, Hacı Mayıl, Alim Qasımov oturmuşdu. 70-80 uşağın içindən mən, Zabit Nəbizadə, Sevinc Sarıyeva və daha bir oğlan qəbul olunduq. Alim Qasımov həmin müsabiqədə səsimi çox bəyəndi. Bu, mənim sənət yolumun başlanğıcı oldu.

- Sonrakı illərdə səsiniz sizi irəli apardı, yoxsa yenə Alim Qasımovun dəstəyi gərəyiniz oldu?

- Alim Qasımovun mənə köməyi çox oldu. Ancaq məni irəli aparan səsim oldu. Milli Konservatoriyada da Alim Qasımovdan dərs aldım. Başa düşən, qiymət verən adamlar səsi olan insanlara mütləq kömək edirlər. Mən özüm də hazırda Suraxanıdakı 3 saylı incəsənət və musiqi məktəbində işləyirəm. Bildiklərimi gələcək nəslə həvəslə öyrədirəm. Çünki mənim özümə də bu köməyi göstəriblər. İstedadı olan gənclərə mütləq kömək eləmək lazımdır. Yoxsa sənət aləmində öz-özünə yol açmaq çox çətindir. İmkan versələr, Asəf Zeynallı adına musiqi məktəbində və Musiqi Akademiyasında dərs deyərəm. Görünür, bunun da vaxtı var. Yəqin bizi qocalanda dərs deməyə dəvət edəcəklər.

- Xanəndə kimi oxumaq çətindir, yoxsa dərs demək?

- Dərs demək həm çətin, həm də çox məsuliyyətli işdir. Bilirsinizmi, tələbənin özündən də çox şey asılıdır. Əgər o, öyrənməyə meyilli, zəhmətə qatlaşandırsa, nəyəsə nail ola bilər. Muğam çox ağır yanrdır. Hər adam da muğamı başa düşmür. Muğamı xalqa yaxşı çatdırmaq lazımdır. Bunun üçün üstümüzə böyük məsuliyyət düşür. Dinləyici də bunu daha yaxşı ayırd edir. Hər xanəndənin qiymətini tamaşaçı verir. O, pisi də, yaxşını da görür.

- Opera Teatrında işləmək əvvəldən arzunuz olub?

- Vallah, yatsaydım da bu teatrda işləyəcəyim yuxuma gəlməzdi. Hər şey Allahın qismətidir. Məqsədim sırf xanəndə olmaq idi. Teatrda işləmək təcrübə toplamağa kömək edir. Kənardan baxana bəlkə də teatrda işləmək asan gəlir. Ancaq belə deyil. Teatr çox ağır və məsuliyyətli yerdir. Mən teatrda təcrübə topladım. Bura gələndən sonra "Leyli və Məcnun"da oynadım. Həmin operada Alim Qasımov Məcnunu, Mələkxanım Əyyubova da Leylini oynayırdı. Mənə də Zeyd rolunu verdilər. Elə gözəl xanəndələrlə bir yerdə səhnəyə çıxmaq mənimçün böyük sevinc idi. "Leyli və Məcnun"da İbn Səlamı da oynayıram.

- Heç şübhəsiz, Opera Teatrına daxil olan hər bir xanəndənin ən böyük arzusu Məcnunu oynamaqdır. Yəqin ki, sizin də belə bir arzunuz var?

- Düz deyirsiniz, Məcnunu oynamaq hər bir xanəndənin arzusudur. Eyni zamanda, mənim də arzumdur. "Aşıq Qərib"də Qərib rolunu oynamışam. Tamaşanı bir dəfə keçən ilin aprelində oynamışıq. O vaxtdan bu vaxta qədər bu tamaşanı repertuara daxil etmirlər. Daha doğrusu, repertuara daxil etmişdilər, sonra da ləğv etdilər. Söz veriblər, yenə də gözləyirəm. İmkan versələr, mart ayında tamaşa yenidən oynanılacaq. Həmçinin, imkan versələr Məcnun rolunu da hazırlayaram.

- Bəyəm sizə maneələr çoxdur? Tez-tez "imkan versələr" sözlərini təkrarlayırsınız.

- Mən özümü Məcnun rolunda görürəm. Əgər səs imkanlarım bu rolu oynamağa qadirdirsə, niyə oxumayım? İbn Səlam rolunu oynayıramsa, demək, Məcnunu da oynaya bilərəm. Ancaq bəzi ünsürlər buna imkan vermirlər. Rəqabət yaxşı şeydir. Ancaq burda sağlam rəqabətdən söhbət getmir. Şəxsən mən istəyirəm ki, hamı gözəl oxusun. Xanəndələrin respublika müsabiqəsində laureat adını qazananda, həmin müsabiqədə iştirak edib yer tutmayanlar hamısı məndən irəli keçdi - xalq, əməkdar artistləri adlarına layiq görüldülər. Təəssüf ki, bu gün sənətdə belə insanlar yer tutub. Yəqin kimsə onlara imkan yaradır. 13 ildir ki, Opera Teatrının solistiyəm. Rəhbərliyə demişəm ki, fəxri ada layiq görülməyim üçün təqdimat yazsın. O isə "burda 35 ildir çalışıb fəxri ad almayanlar var" - deyə cavab verib. Başa düşə bilmirəm, necə olur ki, dünən teatra gələn fəxri ad alır, prezident təqaüdünə layiq görülür, ancaq eləsi də var ki, heç bir ad almadan təqaüdə yollanır. Kim danışmırsa, ürəyi çərləyir, danışana isə "demaqoqsan" deyirlər. Keçirilən musiqi festivallarına hər dəfə eyni adamları göndərirlər. Mədəniyyət və Turizm Nazirliyində insaflı adamlar yoxdur. Bir dəfə demirlər ki, qoy festivala yeni müğənnilər getsin.

- Toylara necə, gedirsinizmi?

- Toylara hərdən gedirəm. Mütəmadi getmək üçün gərək televiziyada reklam olunasan. Televiziyada görünürsənsə, deyirlər ki, demək yaxşı oxuyandır. İndi çox insanların ağılı, şüuru gözündədir. Sırf musiqini bilən, qiymətləndirən yoxdur. Özüm ailə başçısıyam. Dolanışıq üzündən şadlıq evlərində və başqa məclislərdə oxuyub olan-qalan səsimi də xərcləməyə məcburam. Tamaşa da olanda az qalırsan ki, səhnəyə səssiz çıxasan. Teatrda dolanışığımız yaxşı olsa, yəqin ki, əlavə yerlərə qaçmarıq.

- Sizcə populyar olmaq üçün bu gün xanəndədən nə tələb olunur?

- Sponsor lazımdır. Şəxsən mənim bu gün imkanım yoxdur ki, şou-biznes deyilən aləmə qatılım. Mənə də kömək edən olsa, populyar olaram. Teatrda o qədər maaş almıram ki, artıq pulumu reklama, kasetə, televiziyaya xərcləyim. Ona görə mənim kimi adamlar üçün çətindir. Məsələn, elə televiziya kanalları var ki, pulludur, pul verməsən, heç vaxt səni efirə çıxmağa qoymazlar.

- Siz həmçinin Elxan Mansurovun rəhbərlik etdiyi üçlükdə çalışırsınız. Bu üçlüklə bağlı yeni layihələriniz varmı?

- Üçlüklə İrana səfərə hazırlaşırıq. İnşallah, maneələr olmasa, bu səfərimiz reallaşacaq.

Kaspi.- 2008.- 21 fevral.- S. 16.