Rzalı R.

Xocalı faciəsinə həsr olunmuş elektron ünvan

Ötən gün Beynəxalq Mətbuat Mərkəzində 16 il əvvəl Xocalıda ermənilər tərəfindən törədilmiş soyqırımını bütün sənəd və faktlarla ifadə edən yeni elektron ünvanın təqdimat mərasimi keçirildi. Tədbiri Milli Məclisin deputatı, Respublika Uşaq Təşkilatının sədri Gülər Əhmədova açaraq bildirdi ki, 1992-ci il fevralın 26-da erməni işğalçıları xalqımıza qarşı misli görünməmiş cinayətə əl atdılar - soyuq qış günündə sovet ordusunun 366-cı motoatıcı alayının əsgər və zabit heyəti ermənilərlə birləşib Xocalıya hücum edərək əliyalın, heç bir silah-sursatı olmayan dinc əhaliyə divan tutdular. Yüzlərlə soydaşımız - qadınlar, qocalar, uşaqlar amansızcasına qətlə yetirildilər. Bu, azmış kimi, qəddar düşmən qətlə yetirilən soydaşlarımızın cəsədləri ilə insanlığa sığmayan bir şəkildə rəftar etdi - körpələrin, qocaların gözləri çıxarıldı, sifətləri tanınmaz hala salındı.
Xocalı əhalisinin beşdə biri - 613 nəfəri güllələndi. Erməni cəlladları səkkiz ailəni son nəfərinə qədər qətlə yetirdilər. Xocalıda baş verən qətliam nəticəsində 25 azyaşlı uşaq hər iki valideynini itirdi. Mənfur düşmənlər Xocalını işğal edən zaman şəhər sakinlərindən 487 nəfəri əlil oldu. İtkin düşən 115 nəfərin taleyindən isə hələ də heç bir xəbər yoxdur. Bütün qəddarlıqlarına baxmayaraq, ermənilərin bütün xocalıları yer üzündən silmək kimi qara niyyətləri baş tutmadı. Xocalı hadisələri baş verən zaman körpə olan uşaqlar bu gün artıq yeniyetmədirlər.
Milli Məclisin deputatları Musa Quliyev və Zahid Oruc çıxış edərək Xocalı soyqırımını tayı-bərabəri olmayan faciə kimi qiymətləndirdilər və qeyd etdilər ki, dünyanın bu həqiqəti etiraf etməsi üçün virtual aləmin imkanlarından daha çox istifadə edilməlidir. Tədbir iştirakçıları Xocalı soyqırımı barədə həqiqətlərin dünyaya çatdırılması üçün hələ çox iş görülməli olduğunu vurğuladılar.
Tədbirin sonunda Respublika Uşaq Təşkilatının dəstəyi ilə təşkil olunan tədbirdə Xocalı faciəsinə həsr olunmuş elektron ünvan - veb-sayt təqdim olundu. Xocalı faciəsinin bütün təfərrüatı ilə tanış olmaq üçün www.khojaly-az.com saytından istifadə etmək imkanı yaranmışdır.

Azərbaycan.- 2008.- 26 fevral.- S. 7.