Bakıda Alman Uşaq Filmləri Festivalı keçirilib

Alman-Azərbaycan Mədəniyyət Birliyi - "Kapellhaus"da Alman Uşaq Filmləri Festivalının açılış mərasimi keçirilib. Film festivalı Almaniya Federativ Respublikasının Azərbaycandakı səfirliyi və Alman- "Kapellhaus"un təşkilatçılığı ilə keçirilir. Açılış mərasimində çıxış edən Almaniyanın Azərbaycandakı səfirliyinin mədəniyyət şöbəsinin müdiri Herbert Şmiter festival çərçivəsində 10 alman filminin nümayiş etdiriləcəyini bildirib: "Festival çərçivəsində xeyli əvvəl istehsal olunmuş və yeni çəkilən filmlər göstəriləcək. Biz istərdik ki, bizim mədəniyyət proqramımız maraqlı olsun və bu proqram çərçivəsində yüksək səviyyəli tədbirlər keçirilsin. Almaniyada Azərbaycan İlinin keçirilməsini çox yüksək qiymətləndirirəm. Biz sizin mədəniyyətinizi daha yaxından tanımaq istəyirik. İnanıram ki, bu yolda çoxsaylı tədbirlər keçiriləcək".

H.Şmiter deyib ki, bu filmlər daha əvvəllər Ankara və Moskvada da nümayiş etdirilib. Açılış mərasimindən sonra iştirakçılar "Pünktxen və Anton" filminə tamaşa ediblər. Martın 23-dək davam edəcək festival çərçivəsində "Uçan sinif otağı", "Emil və xəfiyyələr", "Heyvanlar konfransı", "Balaca sehirli fleyta", "Buz ürək", "Balaca əkizlər", "Altılığın dünyaya gəlişi", "Balaca ruh", və "Sakitlikdən sonra" filmləri nümayiş olunacaq.

Səs.- 2008.- 22 fevral.- S. 16.