Azərbaycanın birinci xanımı Mehriban Əliyeva Budapeştin tarixi-memarlıq abidələri ilə tanış olmuşdur

AzərTAc xəbər verir ki, fevralın 18-də Azərbaycan Prezidenti İlham Əliyevin Macarıstana dövlət səfəri çərçivəsində ölkəmizin birinci xanımı, Heydər Əliyev Fondunun prezidenti, YUNESKO və İSESKO-nun xoşməramlı səfiri, Milli Məclisin deputatı Mehriban xanım Əliyeva Budapeştin tarixi memarlıq abidələri ilə tanış olmuşdur.
Mehriban xanım əvvəlcə Macarıstan memarlığının qədim abidələrindən olan Buda qəsrinə tamaşa etdi.
Azərbaycanın birinci xanımı Kral sarayının (XIII-XVIII əsrlər) Qəsr muzeyi ilə də tanış oldu. Bildirildi ki, orta əsr Avropa memarlığının gözəl nümunələrindən olan bu qəsr paytaxt Budapeştin əsas simvoludur. Burada Macarıstanın etnoqrafiyasına aid eksponatlar da nümayiş etdirilir. Mehriban Əliyeva qəsrin ərazisini gəzdi, Balıqçılar qalasından Budapeştin mənzərəsini seyr etdi.
Daha sonra Azərbaycanın birinci xanımı müqəddəs Matiyaş kilsəsində (XIII-XV əsrlər) oldu. Orta əsr Avropa memarlığının incilərindən olan kilsə əzəməti ilə diqqəti cəlb edir. Mehriban xanım Əliyeva burada fəxri qonaqlar kitabına ürək sözlərini yazdı.

Azərbaycan.- 2008.- 19 fevral.- S. 2.