Heydər Əliyev Fondu gördüyü işlərlə dövlət qurumlarına və QHT-lərə nümunə olmağa çalışır

2007-ci ildə Heydər Əliyev Fondu (HƏF) bir sıra layihələr həyata keçirib

Əsasən təhsil, səhiyyə, mədəniyyət və idman sahələrinə aid olan bu layihələr ölkənin bütün regionlarını əhatə edir. HƏF-nin icraçı direktoru Anar Ələkbərovun qəzetimizə verdiyi məlumata görə, ötən il həm daha əvvəlki illərdə başlanılan layihələrin icrası davam etdirilib, həm də yeni layihələr həyata keçirilib. O deyib ki, 2005-ci ildə icrasına start verilən “Yeniləşən Azərbaycanda yeni məktəb layihəsi” çərçivəsində ümumilikdə 200-dək məktəb tikilib və ya əsaslı təmir olunub: “Birinci mərhələdə 132 məktəb inşa olunmuşdu, 58 məktəb isə 2006 və 2007-ci illərdə tikilib istifadəyə verildi. Onlardan bəziləri əsaslı şəkildə təmir olundu. Biz bu işimizi bu il də davam etdirmək niyyətindəyik”. A. Ələkbərov bu il həmçinin məktəb tikintisi ilə yanaşı, təhsil müəssisələrinin əyani vəsaitlərlə təmini məsələsinə ciddi fikir veriləcəyini də vurğulayıb. O, 2007-ci ilin sonundan etibarən orta məktəblərdə fənn kabinetlərində istifadə olunan rus dilli əyani vəsaitlərin Azərbaycan dilinə tərcümə olunmağa başlandığını, bu ilin ilk aylarında çap işlərinin tamamlanacağını bildirib.
Ötən il “Uşaq evləri və internat məktəblərinin inkişafı proqramı”nın icrası ilə bağlı da xeyli işlər görülüb. Proqram çərçivəsində bu müəssisələrdə mütəmadi olaraq treninqlər, silsilə tədbirlər keçirilib, valideynlərlə görüşülüb. Bu qurumlarda da yenidənqurma və bərpa işləri həyata keçirilib.
HƏF-nin reallaşdırdığı böyük layihələrdən biri də “Talassemiyasız həyat naminə proqram”dır. HƏF rəsmisi deyib ki, ötən il bu proqram çərçivəsində Talassemiya Mərkəzinin inşasına başlanıb: “Bu layihəni gerçəkləşdirmək üçün Türkiyənin TİKA qurumu ilə sıx əməkdaşlıq edirik. TİKA ilə imzaladığımız müqavilə əsasında bu qurum Talassemiya Mərkəzinin təchizatını həyata keçirəcək. Bu ilin aprel ayında mərkəzin tikilişini yekunlaşdırmağı planlaşdırırıq”.

Türkiyədə Heydər Əliyev Fondunun Nümayəndəliyi açılacaq

Ötən il HƏF üçün həm də ona görə əlamətdar olub ki, onun Rusiya və Rumıniyada nümayəndəlikləri fəaliyyətə başlayıb. “Rusiyada açılan nümayəndəliyimizə ümummilli lider Heydər Əliyevin nəvəsi Leyla Əliyeva rəhbərlik edir. Bu nümayəndəliyimiz ötən il Azərbaycan həqiqətlərinin dünyaya çatdırılması istiqamətində xeyli iş görüb. Moskvadakı 157 saylı Azərbaycan orta məktəbində kütləvi tədbirlər keçirilib. Eyni zamanda, Rusiyanın qocalar və əlillər evlərinə, internat məktəblərinə ziyarətlər edilib”, - deyən A. Ələkbərov bu il ABŞ və Türkiyədə nümayəndəliklərin açılacağını söyləyib. O bu il Rumıniyanın Kluj şəhərində türklərin sıx məskunlaşdığı bölgədə bir məktəbin əsaslı şəkildə təmir olunacağını da bildirib. “Türkiyə şirkətləri və QHT-ləri ilə ciddi əməkdaşlıq edirik. Bu əməkdaşlığı daha da inkişaf etdirmək üçün bu il qardaş ölkədə nümayəndəlik açacağıq. Türkiyənin bu sahə üzrə fəaliyyət göstərən böyük QHT-ləri var və biz bu qurumların təcrübələrindən faydalanmaq istəyirik: Türkiyənin Baş naziri Rəcəb Tayyib Ərdoğanın da yaxın dəstəyini hiss edirik”,- deyə o qeyd edib.
A. Ələkbərov Azərbaycanda fəaliyyət göstərən türk şirkətləri ilə də əməkdaşlıq etdiklərini vurğulayıb. Bunların arasında “Çağ” Öyrətim Şirkətinin xüsusi yer tutduğunu deyən HƏF-nin icraçı direktoru ötən il bu şirkət ilə birlikdə iki böyük layihə (İNEPO Beynəlxalq Ekologiya Olimpiadası və mədəniyyətlərarası dialoqla bağlı beynəlxalq sərgi) gerçəkləşdirdiklərini söyləyib. Bu əməkdaşlığın davamı olaraq bu ilin aprelində bu iki qurum ekologiyaya dair növbəti beynəlxalq olimpiada keçirəcək.

Heydər Əliyev Fondu beynəlxalq donor qurumları Azərbaycana cəlb etmək istəyir

A. Ələkbərov deyib ki, HƏF 2007-ci ili beynəlxalq əməkdaşlığı gücləndirmək istiqamətində prioritet il elan etmişdi. Ona görə də ötən il “Uralsip” maliyyə korporasiyası, “Xabar Or-Avner” Fondu kimi məşhur qurumlar ilə HƏF arasında əməkdaşlıq müqavilələri imzalanıb: “Uralsip” ilə imzalanan müqavilə əsasında bu ilin mart ayında Azərbaycanda serebral iflic xəstəliyindən əziyyət çəkən uşaqlar üçün mərkəzin inşasına başlanacaq. “Xabar Or-Avner” ilə isə “Tolerantlığın ünvanı Azərbaycan” layihəsi həyata keçirilir. Bu layihə çərçivəsində Buzovna qəsəbəsindəki Cümə məscidinin əsaslı təmiri, Yəhudi məktəbinin inşası və Ortadoks kilsəsinin yenidənqurulması nəzərədə tutulub”.
A. Ələkbərovun sözlərinə görə, artıq HƏF beynəlxalq aləmdə tanınan, etibar edilən bir qurumdur. Bu etibarlılığı möhkəmləndirmək üçün UNİSEF, “Save the Children”, BMT İP kimi beynəlxalq qurumlarla birgə layihələr həyata keçirilir. Bundan məqsəd həm HƏF-in dünyada tanıdılması, həm də xarici fondların və donor təşkilatların Azərbaycana cəlb edilməsidir.

Bu il Xocalı soyqırımı 60-a yaxın şəhərdə tanıdılacaq

“Ötən il Xocalı soyqırımının 15-ci ildönümü ilə bağlı dünyanın bir çox ölkələrində silsilə tədbirlər keçirdik. Bu il də fevralın 24-dən etibarən bu işimizi davam etdirəcəyik. Dünyanın 60-a yaxın şəhərində müxtəlif formatlı tədbirlər keçirəcəyik. 30 şəhərdə isə xüsusi foto və filmlərdən ibarət sərgilər təşkil edəcəyik. Bundan başqa, dünyanın nüfuzlu nəşrləri sayılan “Vaşinqton Post”, “İndependent” və “Nyu York Taymz” kimi qəzetlərdə Xocalı soyqırımı ilə bağlı dərc olunan yazılar da sərgi iştirakçılarının diqqətinə çatdırılacaq. Ötən il bizim tərəfimizdən keçirilən “Xocalı uşaqların gözü ilə” adlı rəsm müsabiqəsində iştirak edən əsərlər də sərgilərdə nümayiş etdiriləcək. İstanbul və Ankarada da tədbirlərimiz olacaq. Moskva da xüsusi tədbir keçirəcəyimiz şəhərlər arasında olacaq”.
A. Ələkbərov deyir ki, HƏF gördüyü bütün işlərlə dövlət qurumlarına və digər QHT-lərə nümunə olmağa çalışır. Bunun üçün kitablar və bülletenlər də hazırlayaraq pulsuz şəkildə bu qurumlara paylayır. Ötən il Xarici İşlər Nazirliyi ilə birgə ingilis dilində hazırlanan “Azərbaycana qarşı müharibə: mədəni irsimizin hədəfə alınması” kitabı da bu məqsədə xidmət edir.

İlk dəfə olaraq xaricdə Azərbaycanın maliyyəsi ilə məktəb tikildi

Ötən il HƏF üçün xüsusi bir layihə ilə yadda qaldı. Bu da Pakistanda tikilən qızlar liseyidir. Kəşmirin Müzəffərabad ərazisində ən müasir standartlara uyğun şəkildə inşa olunan lisey Azərbaycanın xaricdə inşa etdiyi ilk təhsil müəssisəsidir. “2005-ci ildə burada dəhşətli zəlzələ baş vermişdi. Fondun prezidenti Mehriban xanım Əliyevanın təşəbbüsü ilə burada qızlar üçün lisey tikmək qərarına gəldik. İnşaat işlərinin icrası üçün Pakistan hökumətinin ERRA təşkilatına müraciət etdik. Ancaq bu təşkilat yalnız 2009-cu ildə sifarişimizi yerinə yetirə biləcəyini söylədiyi üçün biz bununla razılaşmadıq və tikinti işlərini özümüz həyata keçirmək qərarına gəldik. Tenderin qalibi Türkiyənin TURCON şirkəti oldu. Ötən il bu məktəbi tikib istifadəyə verdik. Pakistan rəsmilərinin də etiraf etdiyinə görə, bu məktəbin analoqu bu ölkədə yoxdur. 450 şagird yerlik, müasir labaratoriyalı, akt zalı, kitabxanası və idman meydançaları olan bu məktəbə bundan sonra da yardım etməyi düşünürük”.
Ötən il HƏF-nin reallaşdırdığı layihələrdən biri də “Hərəyə bir ağac əkək” olub. Bu layihə çərçivəsində Azərbaycanın müxtəlif bölgələrində 1,5 milyon ağac əkilib. Əlverişsiz hava şəraiti ucbatından bunlardan 500 mini tələf olsa da qalan ağaclara indi də qulluq göstərilir.
2007-ci ilin yadda qalan layihələrindən biri də Muğam Müsabiqəsi oldu. Bu layihə ilə bağlı olaraq bu il Dənizkənarı milli parkda Muğam Mərkəzinin inşası tamamlanacaq. Tar formalı bu binanın tikintisi avqustda başa çatacaq.
Anar Ələkbərov deyir ki, bu il də yeni layihələrin icrası davam etdiriləcək.

Zaman.- 2008.- 23-25 fevral.- S. 13.