Aşıq Ələsgər adına Aşıqlar muzeyinə rəsmi status verilə bilər

Göyçə mahalının yetirməsi, 81 yaşlı Hüseyn Hacıquluoğlu 2002-ci ildə öz şəxsi mənzilində Aşıq Ələsgər adına Aşıqlar muzeyi yaradıb. Yaşayış binasında yerləşən bu muzeyin önünə vurulmuş, ayrı-ayrı aşıqların böyükölçülü şəkilləri elə uzaqdan diqqəti cəlb edir. Şəxsi mənzilini muzeyə çevirən mədəniyyət təəssübkeşi bu insanla söhbət əsnasında öyrəndik ki, uzun zaman ərzində ölkəmizin müxtəlif bölgələrini gəzib, aşıq sənəti ilə bağlı zəngin mədəni irsi toplamaqla məşğul olub. Onun son altı il ərzində müxtəlif rayonlardan əldə etdiyi, el aşıqlarımızın hələ ictimaiyyətə məlum olmayan fotoları və patefon valları, eləcə də şeir kitabları bu muzeyi bəzəyir. Muzeydə toplanan 600-dən çox patefon valında 4000-dən artıq aşıq mahnısı, el havası var. Tanınmış şəxsiyyətlərin fotolarını - Üzeyir Hacıbəyov, Cabbar Qaryağdıoğlu, Əliağa Vahid, Bülbül, tarzən Qurban Pirimov, Xan Şuşinski və digər korifey sənətkarların şəkillərini də bu muzeydə görmək olar.

Hüseyn Hacıquluoğlu ilə söhbətimizdə yaşı səksəni ötmüş bu el ağsaqqalı muzeyin yaranma prosesindən həvəslə söz açdı: "Babam Məşədi Həsən Aşıq Ələsgərlə yaşıd, həm də onunla möhkəm dost olub. Aşıq Ələsgərin Çəmbərək səmtə - Ardanışa yolu düşəndə mütləq babamın evinə baş çəkər, çox vaxt orada gecələyərmiş. Babam da eynilə Basarkeçərə - Ağkilsə tərəflərə gedəndə hökmən o ulu sənətkarın ziyarətinə, görüşünə gedərmiş. Demək istəyirəm ki, babam da söz-hikmət dünyasına vaqif adam imiş. Babam dünyasını dəyişəndən sonra bu münasibəti həmin ocaqda böyüyüb boya-başa çatan böyük oğlu - atam Hacı Qulu davam etdirib. Hacı Qulu Ağdabanlı Aşıq Qurbanla 1925-ci ilə, Aşıq Ələsgərlə isə 1926-cı ilə - yəni o, iki nəhəng saz-söz xiridarları dünyalarını dəyişənəcən dostluq edib. Atam da elin sayılan-seçilən, səxavətli, xalq təəssübü kişilərindən idi. Onun ölümündən sonra müəyyən hadisələrlə əlaqədar hərə bir yana köç etdi, çox yurdlar salındı. Amma harada yaşasaq da, dədə-baba ocağımızın ünvanı Göyçənin Ardanış kəndi olub. Neçə illərdir ki, ermənilər o müqəddəs yurd yerlərimizi, Dədə Ələsgərin və başqa ustad aşıqlarımızın dolaşdıqları məkanları viran qoyublar. mən də qərara gəldim ki, ulu sənətkarlarımızın ruhuna hörmət əlaməti olaraq Haqq aşığının adını daşıyan belə bir muzey yaradım".

H.Hacıquluoğlu şəxsi təşəbbüsü və vəsaiti il ərsəyə gətirdiyi muzeydə zəngin aşıq sənətinin keçmişi və bu günü, həm də gələcəyini qorumaqla mənəvi irsimizə sahib çıxıb. Onun vətəndaşlıq qeyrəti ilə hərəkət edərək, itib-batmaqda olan qədim aşıq sənəti incilərini topladığı bu muzeydə Aşıq Alı, Aşıq Ələsgər, Ağdabanlı Aşıq Qurban, Dədə Şəmşir, Mikayıl Azaflı, Aşıq Hüseyn Cavan, Aşıq Əsəd Rzayev, Aşıq Abbasqulu, Aşıq Talıb, Aşıq Hüseyn Saraclı, Aşıq Mirzə Bayramov, Aşıq Pənah, Aşıq Növrəs İman, Aşıq Hüseyn Məhərrəmli, Aşıq Hüseyn Bozalqanlı, Aşıq Nabat, Aşıq Mina, Aşıq Gülarə Azaflı, Aşıq Ulduz, Aşıq Minayə, Aşıq Zülfiyyə və tanınmış balabançılar Həsrət Hüseynov, Əli Kərimov və başqa el sənətkarlarına aid dəyərli eksponatlar yer alıb. H.Hacıquluoğlu həmçinin muzeyə gələn qonaqlar üçün valların səsləndirilməsi məqsədilə Rostovdan öz şəxsi vəsaiti hesabına Azərbaycanda analoqu olmayan 2 qədimi patefon, iki qrammafon da gətirdib. O bu yaxınlarda İstanbulda olarkən vaxtilə Aşıq Ələsgərlə deyişmiş məşhur türk aşığı Çıldırlı Aşıq Şenliyin və başqa ozanların şəkillərini əldə edib. Muzeyə soydaşlarımızla yanaşı, xarici turistlər və araşdırma ilə məşğul olan alimlər də müntəzəm baş çəkirlər.

Muzeyə topladığı qədim el aşıqlarının şəkilləri, fotoları və kitablarını əldə etməkdə müxtəlif çətinliklərlə üzləşən H.Hacıquluoğlu bu işdə ona mənəvi dəstək verən, muzeyin dövlət statusu alması üçün mədəniyyət və turizm naziri Ə.Qarayevə müraciət edən bir qrup ziyalının əməyini minnətdarlıqla vurğuladı: "Akademik Teymur Bünyadova, millət vəkilləri Nizami Cəfərova, Qənirə Paşayevaya, xalq şairləri Zəlimxan Yaquba, Nəriman Həsənzadəyə, professorlar Hüseyn İsmayılova, Qəzənfər Paşayevə, Qara Namazova və Elxan Məmmədliyə öz təşəkkürümü bildirirəm. Onlar mədəniyyət və turizm naziri, mədəniyyətimizin inkişafı üçün yorulmadan çalışan Əbülfəs Qarayevə məktub göndərərək muzeyin dövlət statusu alması, rəsmiləşdirilməsini xahiş ediblər".

İyunun 25-də mədəniyyət və turizm naziri Ə.Qarayevlə görüşdüyünü bildirən H.Hacıquluoğlu nazirin muzeyin yaranması işini təqdir etdiyini vurğuladı. Sentyabrda keçiriləcək Aşıqlar qurultayında iştirak edəcəyinin deyən H.Hacıquluoğlu artıq muzeyə ayrıca bina tikilməsinin və rəsmi dövlət statusu verilməsinin nəzərdə tutulduğunu açıqladı: "İnanıram ki, yaratdığım bu muzeyə rəsmi status verilməsi və onun dövlət qayğısı ilə əhatə olunması milli-mənəvi dəyərlərimizə böyük qayğının növbəti nümunəsi, mədəniyyət və incəsənətimizin inkişafına layiqli töhfə olacaq".

525-ci qəzet.- 2008.- 10 iyul.- S. 7.