"Göyərçin" monumental abidəsinin açılış mərasimi keçirilib


Mədəniyyət və Turizm Nazirliyinin məlumatına əsasən, Sumqayıt şəhərində Nəsimi adına Mədəniyyət və İstirahət Parkında təmir-bərpa işlərinin başa çatması ilə əlaqədar "Göyərçin" monumental abidəsinin və Fontan-Şəlalə kompleksinin açılış mərasimi keçirilmişdir. "Göyərçin" monumental abidəsi həm də yeni ailə quran gənclərin ziyarət yeri kimi tanınır. Həmin ənənənin davamı olaraq gəlin-bəy cütlüyünün mərasimə gəlişini tamaşaçılar maraqla qarşıladılar. El ağsaqqalı Dədə Qorqud gənclərə xeyir-dua verdi. Tədbirdə iştirak edən şəhər icra hakiimiyyətinin başçısı Vaqif Əliyev parkın açılışı münasibətilə sumqayıtlıları, ailə qurmaları münasibətilə gəncləri təbrik etdi. 12 iyulun bundan sonra şəhərimizdə "Gənc ailə quranlar günü" kimi qeyd olunacağını bidirən V.Əliyev gəlin-bəy cütlüyünə hədiyyələr təqdim etdi. Tədbirdə C.Cabbarlı adına mədəniyyət evinin, musiqi məktəblərinin özfəaliyyət kollektivlərinin ifasında səslənən mahnılar, Break-Danse qrupunun çıxışı tamaşaçıların böyük marağına səbəb oldu və alqışlarla qarşılandı.

 

Səs.- 2008.- 15 iyul.- S. 12.