Turizmin inkişafı üçün yeni layihələr

Avropa Spa Assosiasiyasının (ESPA) prezidenti Yoaşim Lieber və həmin şirkətin baş mütəxəssisi doktor Kurt Von Stroc 30 iyun-3 iyul 2008-ci il tarixlərində Azərbaycan Respublikasına səfərdədirlər. Bildiyiniz kimi, Azərbaycanda qeyri-neft sektorunun inkişafı çərçivəsində turizm sahəsi böyük prioritetlərdən biridir və onun müxtəlif növləri də inkişaf etməkdədir.

Belə ki, Avropa Spa Assosiasiyasının nümayəndələrinin Azərbaycana səfərinin məqsədi müalicəvi turizmi tətbiq etmək, Naftalan, Qəbələ rayonlarında spa-mərkəzlərinə baxış keçirmək və respublikamızda spa-turizmin inkişafı üçün yekun tövsiyələr, layihələrin hazırlanması və Mədəniyyət və Turizm Nazirliyinə təqdim edilməsidir.

İyulun 1-də ESPA-nın nümayəndələri Azərbaycan Respublikası Mədəniyyət və Turizm Nazirliyinin, Elmi-Tədqiqat Tibbi Bərpa İnstitutunun nümayəndələri ilə görüş keçiriblər. Mədəniyyət və Turizm Nazirliyi tərəfindən respublikanın turizm imkanları, spa-turizmin hazırkı vəziyyəti barədə ətraflı məlumat verilmişdir.

Bundan əlavə, respublikamızda fəaliyyət göstərən istirahət və spa-mərkəzlərinin, turizm şirkətlərinin nümayəndələri üçün ESPA-nın fəaliyyəti ilə bağlı təqdimat keçirilmişdir.

Həmçinin spa-turizmin inkişafı məqsədilə bu sahədə kadrların hazırlanması barədə müzakirələr aparılmışdır.

Respublika.- 2008.- 2 iyul.- S. 8.