Rüstəm İbrahimbəyov: Bizim
düşmənlərimiz Ermənistan rəhbərliyi, ordusu
və siyasətçiləridir
30-cu Moskva Beynəlxalq Kinofestivalında
Ukraynada yaşayıb-yaradan kinorejissor Roman Balayanın Rüstəm İbrahimbəyovun
ssenarisi üzrə çəkdiyi "Cənnət
quşları" filmi
müsabiqə proqramı
çərçivəsində nümayişlənib. Filmin
çəkilişlərinə sərf olunmuş 17,5 milyon Ukrayna qrivnasının 70 faizini ölkənin Mədəniyyət
Nazirliyi ödəyib.
Erməniəsilli rejissorla
neçə ildən
bəri davam edən əməkdaşlığa
son qoymamasından narahat olan həmvətənlərinə
isə Rüstəm İbrahimbəyovun cavabı
belədir: "Ssenarini
15 il öncə yazmışam. Roman Balayan filmin mövzusunu seçərkən
Dmitri Savitskinin "K.
üçün vals"
kitabından bəhrələnib.
Mən əsərlə
tanış olandan sonra əməkdaşlığa
razılıq verdim. Burda hadisələr ötən əsrin 80-ci illərində Ukraynada baş verir. Hadisələrdə nə
ermənilər iştirak
edir, nə də azərbaycanlılar.
Mən anlaya bilmirəm ki, Ukrayna vətəndaşı
olan erməniəsilli
rejissorla birgə fəaliyyət nəyə
görə belə neqativ reaksiya doğurur. Yalnız vəhşilər belə
fikirləşə bilərlər.
Erməni xalqı bizim düşmənimiz deyil. Bizim düşmənlərimiz
Ermənistanın rəhbərliyi,
ordusu və siyasətçiləridir. Biz
hər yerdə bəyan etməliyik ki, erməni xalqı ilə düşmənçilik etmirik.
Biz Qarabağı qaytarmaq istəyirik və biz buna
o ərazilərin əhalisi ilə birlikdə nail olacağıq. Bizim siyasətimiz elə qurulmalıdır ki, erməni və Azərbaycan xalqı bir-birinə düşmən gözü
ilə baxmasın.
10-15 ildən sonra hamımız deyəcəyik
dostuq, qardaşıq.
Bu çox çətin məsələdir.
Biz ermənilərlə
düşmənçilikdən danışmaqla öz ziyanımıza hərəkət
etmiş oluruq. Ermənilər etiraf edirlər ki, Azərbaycana qayıda bilməzlər, çünki
azərbaycanlıları sevmirlər.
Buna görə də biz bəyan
etməliyik erməni xalqına, sadə erməniəsilli insana qarşı nifrət hissimiz yoxdur. Biz erməni ordusu ilə mübarizə etməliyik.
Biz bu situasiyadan
danışıqlar yolu
ilə də olmasa, hərbi yolla çıxacağıq..."
Həftə içi.- 2008.- 1 iyul.- S. 8.