Aktyor və rejissor Ramiz Əzizbəylinin 60 illik yubileyinə

2008-ci il iyulun 20-də tanınmış aktyor və rejissor Ramiz Əzizbəylinin 60 yaşı tamam olur. Ömrünün çox hissəsini teatra və kinoya həsr etmiş istedadlı sənətkar Azərbaycanın görkəmli sənət ustaları Möhsün Sənani, Ağadadaş Qurbanov, Hökumə Qurbanova, Əliağa Ağayev, Leyla Bədirbəyli, Adil İsgəndərov və neçə-neçə səhnə korifeyləri ilə çiyin-çiyinə çalışıb və onların təcrübəsindən bəhrələnərək kino, teatr və televiziyada müxtəlif səpkili, parlaq və tamaşaçı tərəfindən sevilən obrazlar yaradıb və filmlərə quruluş verib.

Əzizbəyli Ramiz Hacıağa oğlu Bakıda ziyalı ailəsində anadan olub və uşaq yaşlarından aktyorluq sənətinə meyl göstərərək, həyətdə, məktəbdə, dərnəklərdə təşkil olunan tamaşalarda, sonralar isə televiziyanın uşaq verilişlərində fəal iştirak edib. 1977-ci ildə Azərbaycan Dövlət Mədəniyyət və İncəsənət Universitetinin Mədəni-maarif fakültəsini bitirərək "Azərbaycanfilm" kinostudiyasında fəaliyyətini davam etdirib, irili-xırdalı 30-a yaxın bədii filmdə, "Mozalan" satirik kinojurnallarında yadda qalan və sevilən obrazlar yaradıb, 1000-dən çox xarici filmlərin Azərbaycan dilinə dublyajına əmək sərf edib.

1987-ci ildə "Debüt" studiyasında çəkdiyi "Pirverdinin xoruzu" qısametrajlı bədii filmi ilə o, rejissorluq fəaliyyətinə başlayıb və ilk çəkdiyi film ona uğur gətirib. Film bir neçə Beynəlxalq kinofestivalda müvəffəqiyyətlə iştirak edib, Kiyev şəhərində keçirilən Ümumittifaq festivalda isə rejissor debütünə görə mükafata layiq görülüb. 1992-ci ildə yeni iqtisadi münasibətlərin formalaşdığı bir zamanda Ramiz Əzizbəyli tamaşaçıya və bazara hesablanmış "Bəxt üzüyü" tammetrajlı bədii filmini çəkdi. Film kinoteatrlarda nümayiş olunan ən baxımlı kassa filmi və yeni tariximizdə çəkilən ilk ən gəlirli kino işi kimi yadda qaldı. Film Daşkənddə keçirilən Asiya və Latın Amerikası ölkələrinin kinofestivalında xüsusi diploma layiq görüldü. Rejissor kimi çəkdiyi son bədii filmi olan "Yalan" Qarabağ probleminə, onun törətdiyi faciələrə həsr edilib.

Əməkdar artist fəxri adına layiq görülmüş Ramiz Əzizbəyli Kinematoqrafçılar İttifaqının və Professional Kinorejissorlar Gildiyasının üzvü olaraq milli kinematoqrafıyanın ictimai həyatında fəal iştirak edən, ADMİU-nun dosenti kimi, gənc kadrların hazırlanmasına, formalaşmasına öz töhfəsini verən, həmkarları və dostları arasında nüfuza, hörmətə malik sənətçidir.

Hörmətli və əziz həmkarımızı 60 illik yubileyi münasibətilə ürəkdən təbrik edir, ona həyatda və sənətdə yeni-yeni uğurlar arzulayırıq.

525-ci qəzet.- 2008.- 19 iyul.- S. 27.