"Cənnətim Qarabağ" albomu işıq üzü görüb

Alboma "Cənnətim Qarabağ", "Qarabağ şikəstdsi", "Mənsuriyyə", "Yar bizə qonaq gələcək", "Qatar" muğamı kimi musiqi nömrələri daxil edilib.

Bildiyimiz kimi, Azərbaycan musiqi sənəti tarixində mühüm rol oynamış Cabbar Qaryağdıoğlunun yubileyi ilə əlaqədar Prezidentin Sərəncamı əsasında Azərbaycan Mədəniyyət və Turizm Nazirliyinin xətti ilə "Salnamə" sənədli filmlər studiyası tərəfindən "Cabbar Qaryağdıoğlu" filmi istehsal olunmuşdur.

Sənədli film 42 dəqiqədən ibarətdir. Filmin yaxın günlərdə təqdimat mərasiminin keçirilməsi nəzərdə tutulur. Qeyd olunan ekran əsərinin rejissoru Kəmalə Musazadə, ssenari müəllifi Aydın Qurbanov və Kəmalə Musazadə, operatoru Köçəri Məmmədovdur. Azərbaycan musiqi xadimlərinə olan diqqət və məhəbbətin davamı kimi Kəmalə xanım milli sənət nümunələrinin həyata keçirilməsi məqsədilə yeni bir layihə ilə çıxış etmişdir. Belə ki, o, bu günlərdə "Cənnətim Qarabağ" adlı diskin işıq üzü görməsinə nail olmuşdur. Diskdə Cavidan Qəhrəmanlının ifasında muğam, təsnif, xalq mahnıları daxil edilmişdir. Belə ki, "Cənnətim Qarabağ", "Qarabağ şikəstəsi", "Mənsuriyyə", "Yar bizə qonaq gələcək", "Qatar" muğarriı və başqa musiqi nömrələri daxil olunmuşdur. Diskə Cənnətim Qarabağ adının verilməsi təsadüfi deyildir. Çünki mahnıların ifaçısı Cavidan Qəhrəmanlı Bakıda doğulsa da, əslən Qarabağdandır. Valideynləri Qarabağın Tərtər kəndində yaşayıb-yaratmış, tarixi hadisələr dövründə öz el-obalarından uzaq düşmüşlər. "Bizim kəndimiz işğal olunmayıb. Mən hər il öz kəndimizə gedirəm. Qarabağ torpağının suyundan içib, havasından uduram" - deyən Cavidan Qəhrəmanlı Ağdama, Şuşaya, Xankəndinə də getmək arzusundadır. Belə böyük bir arzularla yaşayan balaca musiqiçi "Cənnətim Qarabağ" albomuna Azərbaycanın gözəlliyini vəsf edən musiqi nömrələrini daxil etmişdir.

Qeyd edim ki, balaca xanəndə bir çox musiqi festivallarında iştirak etmiş, bir çox fəxri fərmanlarla təltif olunmuşdur. Hazırda o, Muğam Teatrının nəzdində fəaliyyət göstərən R.Babayev adına 25 saylı musiqi məktəbində təhsil alır. Bu balaca Cavidanın təsnif və xalq mahnılarından ibarət ilk albomudur. Belə bir musiqi nömrələri ilə sənət aləmində addımlarını atan Cavidan Azərbaycanın çoxəsrlik tarixini yaşadan və dünyada özünə nüfuz qazandıran muğamların mahnı ifaçısı olmasına şübhə etmirik. Albomla bağlı bir məqamı da qeyd etmək istərdim ki, "Cənnətim Qarabağ" albomu nəfis bir şəkildə təltif olunmuşdur. Belə ki, albomun üz qabığında milli ornamentlər əsasında Azərbaycan bayrağının rənglərini əks etdirən qırmızı, yaşıl və göy boyalardan istifadə olunmuşdur. Bu, təsadüfi deyildir. Eyni zamanda, Cıdır düzünün təsviri albomun orijinallığına müsbət təsir göstərir.

Səs.- 2008.- 8 iyul.- S. 16.