Samirə

Həştərxandan gələn gəmi

İrina və Elina Əliyevalar: "Ən böyük arzumuz Azərbaycanda çıxış etməkdir"

Sizi Rusiya Federasiyasının Həştərxan şəhərində yaşayan həmyerlilərimiz İrina və Elina Əliyeva bacıları ilə tanış etmək istəyirik. Bakıya budəfəki səfərləri zamanı onlar redaksiyamızın da qonağı oldular. İrina Saratov Hüquq Akademiyasının məzunudur. Ümumrusiya Azərbaycanlıları Konqresinin Həştərxan vilayəti üzrə təşkilatının Gənclər Komitəsinin sədridir. Bundan savayı, Türk Xalqları Assosiasiyasının tolerantlıq üzrə cəmiyyətinə rəhbərlik də ona həvalə edilib. Elina isə hazırda paralel olaraq 2 ali məktəbdə təhsil alır - Həştərxan Dövlət Texniki İnstitutunda və Həştərxan Dövlət Konservatoriyasının akademik vokal sinfində. Onların hər ikisi mükəmməl ibtidai musiqi təhsili alıb. Həştərxan vilayəti Mədəniyyət və İncəsənət Mərkəzinin solistidirlər. Elina: - Uşaqlıqdan mahnı oxumağa həvəsliyik. Əsasən estrada mahnılarını. 4 il öncə bacımla duet yaradaraq müxtəlif tədbirlərdə çıxış etməyə başladıq. 2 il əvvəl isə repertuarımızı Azərbaycan xalq mahnıları ilə də zənginləşdirdik. S.: - Hansı mahnıları seçdiniz? (Bu sualın cavabında müsahibimiz xalq mahnıları ilə bir sırada Fikrət Əmirovun "Reyhan" mahnısının da adını çəkdi.) E.: - "Bağdagül", "Reyhan", "Aman ovçu", "Bu qala daşlı qala" və bir neçə başqa mahnı. Doğrudur, Azərbaycan dilində danışmağa vərdiş etməməyimiz bu mahnıları oxuyanda hiss olunur. Amma görürük ki, insanlar həvəslə dinləyirlər. İrina: - Çalışırıq Rusiya ərazisində mahnılarımızı tanıdaq, sevdirək. Bütün tədbirlərdə mütləq onları ifa edirik. Ordakı azərbaycanlılar doğma musiqi üçün çox darıxırlar. E.: - Əvvəllər biz Azərbaycan mahnıları oxumaq istədiyimizi bildirəndə konsert təşkilatçıları bunu çox da həvəslə qəbul etmirdilər. Amma indi özləri təklif edirlər ki, mahnıların ikisini rus müəlliflərindən oxuyanda ikisini də Azərbaycan müəlliflərindən oxuyaq. S.: - Bu mahnıları öyrənməkdə kim sizə kömək etdi? E.: - Atam. Ümumrusiya Azərbaycanlıları Konqresinin Həştərxan vilayəti üzrə təşkilatının sədr müavini Arif Əliyev. O bizim həm prodüserimizdir, həm menecerimizdir, həm də çox ciddi tənqidçimizdir. Əlbəttə, Azərbaycan mahnıları yazılmış kaset və disklərin Rusiya ərazisində defisit olması çətinlik törədir. Amma atamızın sayəsində biz bu çətinliyi o qədər də hiss etmirik. O özü mahnıların düzgün ifasını, ifadələrin tələffüzünü bizə öyrədir. S.: - Korifeylərimizdən kimlərin ifasını dinləmisiniz, kimlərlə tanışsınız? E.: - Rəşid Behbudovun, Zeynəb Xanlarovanın, Fidan və Xuraman Qasımovaların, Müslüm Maqomayevin və əlbəttə ki Brilyant Dadaşovanın ifalarını həvəslə dinləyirik. Fidan xanım və Xuraman xanım hətta disklərinin eksklüziv nüsxəsini bizə hədiyyə ediblər. Müslüm Maqomayevlə isə ötən il Bakıda baş tutan Dünya Azərbaycanlılarının II qurultayında tanış olduq. S.: - Bəs son dövrdə fəaliyyət göstərməyə başlayan müğənnilərdən kimi bəyənirsiniz? - E.: - Tünzalə Ağayevanın, gənc muğam ifaçısı Eldənizin ifasını çox bəyənirik. S.: - Müğənniliklə məşğul olduğunuz bu 4 ildə hansı müsabiqələrdə, festivallarda iştirak etmisiniz? E.: - 2005-ci ildə Ulyanovskda keçirilən gənc ifaçıların ümumrusiya müsabiqəsində, 2007-ci ildə Moskvada keçirilən "Gözəllik dünyanı xilas edəcək" adlı müsabiqədə - bu müsabiqədə münsiflər heyətinin sədri Rinat İbrahimov, Soçidə baş tutan "İnkişaf" festivalında isə münsiflər heyətinin sədri Rüstəm İbrahimbəyov idi. Hər yerdə Azərbaycan mahnılarını ifa edərək laureat adını qazanmışıq. Keçən il keçirilən "Yalta - Moskva - Tranzit" müsabiqəsinin şərtlərinə görə isə iştirakçılar rus mahnıları ifa etməliydilər. Biz bu müsabiqədə 1-ci yerə layiq görüldük. İ.: - Bizim üçün bir şey aydındır ki, incəsənət sahəsi ilə həmişə məşğul olacağıq. S.: - Sizin rəhbərlik etdiyiniz təşkilatın əsas vəzifəsi nədən ibarətdir? - Başlıca vəzifəmiz Həştərxanda yaşayan azərbaycanlı gəncləri vaxtaşırı bir araya toplayıb onların təşəbbüslərinə, layihələrinə dayaq olmaq, Azərbaycanda baş verən dəyişikliklər barədə gənc azərbaycanlıları xəbərdar etmək, burdakı siyasi, ictimai ab-havanın nədən ibarət olduğu barədə gəncləri məlumatlandırmaqdır. Oxumaq isə bu işləri yerinə yetirməkdə əsas stimul verən amildir. S.: - İstər bəstəkar, istərsə də xalq mahnılarımızın ermənilər tərəfindən tez-tez özününküləşdirilməsi halları baş verir. Siz həm gənc bir hüquqşünas, həm də müəyyən səlahiyyətlərə malik azərbaycanlı kimi belə halların qarşısını almaqdan ötrü nə edə bilərsiniz? İ.: - Sözün düzü, Rusiyada mahnılarımızın özününküləşdirilməsi halları ilə rastlaşmamışam. Ümumiyyətlə isə belə halların aradan qaldırılması Müəllif Hüquqları Agentliyinin səlahiyyətində olan məsələdir. Bizim təşkilat yalnız düzgün məlumatı çatdıra bilər, saxtakarlığı aradan qaldırmaq isə bizim səlahiyyətimizdə deyil. Bir məqamı nəzərinizə çatdırım ki, Rusiya Federasiyasında bu yaxınlarda yeni əsasnamə qəbul olundu. Həmin əsasnaməyə görə, rus xalq və ya bəstəkar mahnısını ifa etmək istəyən müğənni müvafiq quruma üzvlük haqqı ödəməlidir. Demək istəyirəm ki, əqli mülkiyyətin müəllifliyinin saxtalaşdırılmasının qarşısını almaqdan ötrü tətbiq ediləsi bir neçə qayda tapmaq olar. ı Söhbətimizin sonunda qızlar özlərinin də bir neçə bəstəsinin olduğunu, onlardan hələlik yalnız üçünü yazdırdıqlarını qeyd etdilər. Ataları Arif Əliyev isə İrina ilə Elinanın muğam adlarına köklənmiş Azərbaycan mahnısı ərsəyə gətirmələrini arzu etdiyini bildirdi. Bacılar vurğuladılar ki, ən böyük arzuları Azərbaycanda, doğma auditoriya qarşısında çıxış etməkdir. Söhbətdə iştirak edən İrina ilə Elinanın anası Natalya xanım (əslən Qroznıdan olan bu xanım-xatın qadının babası iranlı imiş) Bakı əhalisinin davranışının daha sərbəst olduğunu qeyd etdi. Onu da dedi ki, yeni təzahürlərə açıq olan paytaxtımızın sakinləri əzəli keyfiyyətləri olan ünsiyyətcilliyi, nabələd adama xoş münasibəti yadırğamayıblar.

Həftə içi.- 2008.- 22 iyul.- S. 8.