Avropa Şurası Mədəniyyət nazirləri Bakı Konfransının Təşkilat Komitəsi tədbirlə bağlı məsələləri müzakirə etmişdir

 

Xəbər verdiyimiz kimi, bu il dekabrın 2-3-də Bakıda Avropa Şurası Mədəniyyət Nazirlərinin "Mədəniyyətlərarası dialoq - Avropa və onun qonşu regionlarında sülhün və davamlı inkişafın əsasıdır" mövzusunda beynəlxalq konfransı keçiriləcəkdir. Tədbirə Avropa Şurasına üzv dövlətlərin Mədəniyyət nazirləri ilə yanaşı, İSESKO və ALEKSO təşkilatlarına üzv olan dövlətlərin, mədəniyyət sahəsində fəal əməkdaşlıq həyata keçirən beynəlxalq hökumətlərarası və qeyri-hökumət təşkilatlarının nümayəndələri də dəvət olunacaqlar.

lyulun 23-də Azərbaycanın Mədəniyyət və Turizm naziri Əbülfəs Qarayevin rəhbərlik etdiyi təşkilat komitəsinin iclası keçirilmişdir. İclasda konfransın gündəliyi, konfrans çərçivəsində nəzərdə tutulan mədəni proqramlar, keçiriləcək tədbirlərə hazırlıq və digər təşkilati məsələlər müzakirə olunmuşdur.

Azərbaycanın məqsədi eyni zamanda həm Avropa Şurasına, həm də İSESKO-ya üzv olan yeganə dövlət kimi konfransın açacağı imkandan bəhrələnərək Avropa ilə islam dünyası arasında mədəniyyət körpüsü rolunu oynamaq və iki sivilizasiya arasında dialoqun inkişaf etdirilməsini nəzərdə tutan "Bakı prosesi"nin əsasını qoymaqla özünün beynəlxalq nüfuzunu daha da gücləndirməkdir.

 

Respublika.- 2008.- 24 iyul.- S. 1.