Sevda

Gürcüstanda Azərbaycan teatrının vəziyyəti yaxşılaşdırılıb

Yaxın aylar üçün sənət ocağının açılışı gözlənilir

Tbilisi-Azərbaycan Teatrında ciddi təmir işlərinə başlanılıb. Uzun illər vəziyyəti qənaətbəxş olmayan teatr yeni görkəmdə və yeni avadanlıqlarla tamaşaçılarının ixtiyarına veriləcək. Bu xəbəri "Kaspi"yə Gürcüstan Azərbaycanlıları Konqresinin həmtəsisçisi Əli Babayev verib. O bildirib ki, Gürcüstan prezidentinin sərəncamı ilə teatra ümummilli lider Heydər Əliyevin adı verilib və hazırda sənət ocağında yenidənqurma işləri aparılır. Xəbərin davamında təmir işləri ilə Azərbaycan Mədəniyyət və Turizm Nazirliyinin maraqlandığı bildirilir. Söhbətinin davamında Əli Babayev teatrın açılışının qeyd olunacağını və burada dövlət başçılarının iştirakının gözlənildiyini bildirdi: "Hazırda Gürcüstan meriyası əsas gücünü teatrın yenidənqurma işlərinə səfərbər edib. Təmir işləri yekunlaşandan sonra teatra yeni avadanlıqların gətirilməsi planlaşdırılır. Eyni zamanda, yaxın gələcəkdə azərbaycanlı teatr adamları ilə gürcüstanlıların sözügedən teatrda birgə tamaşa hazırlayacaqları planlaşdırılıb". Hər iki dövlətin aktyor heyəti birgə səhnəni bölüşəcəklər.

Əli Babayev gələcəkdə azərbaycanlı mütəxəssislərin teatra işə cəlb olunacağını da diqqətə çatdırdı. Xatırladaq ki, zəngin keçmişi olan Azərbaycan teatrının təməli 1872-ci ildə Tbilisidə qoyulub. Lakin son illər teatrda avadanlıq, truppa və şəraitsizlik problemi meydana çıxmışdı. Eyni zamanda sənət ocağının maddi durumu da qaydasında deyildi. Əli Babayevin xatırlatmasına görə, uzun illər öncə Gürcüstanda azərbaycanlıların bir sıra mədəniyyət ocaqları olub. Son illər isə onlardan haqqında danışdığımız teatr, Mədəniyyət Mərkəzi və M.F.Axundov muzeyi fəaliyyətini qoruyub saxlaya bilib

Kaspi.- 2008.- 11 iyul.- S. 15.