"Ağ və Qara"dan sonra...

Akademik Opera və Balet Teatrının səhnəsində “Ağ və Qara” baletinin təqdimat mərasimi keçirilib. Xəyyam Mirzəzadəyə aid balet tamaşaçılara ilk olaraq səkkiz il bundan əvvəl göstərilib. Bu müddət ərzində tamaşa teatrın səhnəsində mövsümdə bir neçə dəfə nümayiş etdirilsə də, son iki ildə bu balet nümayiş olunmayıb.

Baletin yenidən səhnəyə qayıtması musiqiçilərin sevincinə səbəb oldu. Məsələn, baletin fortepiano partiyasını ifa edən Bakı Musiqi Akademiyasının dosenti Kəmalə Neymanova tamaşanın çox zəngin və dərin musiqi əsəri olduğunu bildirib: «Mən bunu ifa edəndə böyük məmnunluq hissi keçirdim. Təəssüf ki, biz çox az məşq etmişdik, buna baxmayaraq, çox çalışdım. X.Mirzəzadənin musiqilərində çoxlu incəliklər, dərinliklər var ki, onları duya bilirəm. Xoreoqrafik baxımdan tamaşa gözəl düşünülmüşdü. Hər şey canlı və müasir idi».

Baletmeystr Pulumb Aqilıu isə baletin xoreoqrafiyasının doğrudan da, effektli və maraqlı olduğunu, «Ağ və Qara» baletində bir neçə prelüdü dəyişdiyini vurğuladı. Baletin nümayişindən sonra təəssüratlarını bölüşən bəstəkar Xəyyam Mirzəzadə əsərin ona uğur gətirdiyini bildirdi: «Baletin yeni versiyası çox uğurlu alındı. Sonuncu tamaşada Pulumb Aqilıu ilə belə qərara gəldik ki, rəqqasların sayını azaldaq. Çünki onlar səhnədə bir-birlərinə mane olurdular. Düzdü, artistlər, sona qədər bir-birlərinə öyrəşməsələr də, növbəti «Ağ və Qara» daha maraqlı alınacaq. Mən tamaşadan çox razıyam. Tamaşa iki ildir ki, oynanılmırdı. Balet 2000-ci ildə tamaşaya qoyulub və cəmi üç mövsüm teatrın səhnəsində təqdim olunub».

Mədəniyyət.- 2008.- 3 iyul.- S. 3.