Azərbaycan qirara sivilizasiyalarara əməkdaşlıqda inkişafdadır

 

Avropa Şurasına üzv dövlətlərin mədəniyyət nazirlərinin iclasının təşkil edilməsi ilə əlaqədar, Bakıda Avropa Şurası-Azərbaycan işçi qrupunun növbəti iclası keçirilmişdir. Bu məqsədlə, Avropa Şurasının Mədəniyyət, Mədəni və Təbii İrs üzrə direktoru Robert Palmerin rəhbərliyi altında nümayəndə heyəti və İSESKO-nun nümayəndəsi Abdulilah Ben Arafa 6-9 iyul tarixlərində Bakıda səfərdə olmuşlar. Səfər çərçivəsində işçi qrupun iclasında iştirak etməklə yanaşı, AŞ-nin nümayəndə heyəti mədəniyyət və turizm naziri Əbülfəs Qarayev tərəfindən qəbul olunmuş, həmçinin, Xarici İşlər Nazirliyində görüş keçirmişlər. Görüşlər zamanı AŞ-nin mədəniyyət nazirlərinin konfransı və regionda mədəni irsin vəziyyətini öyrənmək üçün nəzərdə tutulan AŞ katibliyinin missiyası ilə bağlı məsələlər barədə müzakirələr aparılmışdır. Mədəniyyət və Turizm Nazirliyinin təşəbbüsü ilə 2008-ci ilin 2-3 dekabrında keçiriləcək Avropa Şurasının Bakı konfransı "Mədəniyyətlərarası dialoq-Avropa və onun qonşu regionlarında sülhün və davamlı inkişafın əsasıdır" mövzusuna həsr olunacaq. Sözügedən konfransa Mədəniyyət və Turizm Nazirliyi tərəfindən Avropa Şurasına üzv dövlətlərin mədəniyyət nazirləri ilə yanaşı, qonşu regionlardan İSESKO və ALEKSO təşkilatlarının bir sıra üzv dövlətləri, həmçinin, mədəniyyət sahəsində fəal əməkdaşlıq həyata keçirən beynəlxalq hökumətlərarası və qeyri-hökumət təşkilatları da dəvət olunacaq. Konfransla yanaşı, 2008-ci ilin 4 dekabrında konfrans çərçivəsində Bakıda Avropa Şurasının Mədəniyyət üzrə Rəhbər Komitəsinin Bürosunun və Avropa Şurasının Kiyev Təşəbbüsü Regional Proqramının Milli Koordinatorlarının növbəti görüşləri, 2008-ci il 4-5 dekabrında isə "Avropada Mədəniyyət Siyasəti və Təmayülləri Kompendiumu" layihəsinin "10 illik yubileyi"nə həsr olunan Avropa Şurasına üzv-dövlətlərin milli müəlliflərinin iclası keçiriləcəkdir. Mədəniyyət və Turizm Nazirliyi Avropa Şurasına üzv-dövlətlərin kompendium üzrə milli müəllifləri ilə əməkdaşlığı gücləndirməklə, Azərbaycanın beynəlxalq səviyyədə təşviq olunmasında onların imkanlarından faydalanmaq istəyir, çünki həmin müəlliflər Avropa ictimai rəyinə ciddi təsir etməklə yanaşı, həmçinin, Avropanın intellektual həyatında xüsusi nüfuza malik olan şəxslərdir. Respublika Prezidenti İlham Əliyevin bilavasitə dəstəyi ilə təşkil olunacaq Avropa Şurasının konfrans və digər tədbirlərinin keçirilməsində Azərbaycan tərəfinin əsas məqsədi həm Avropa Şurasına, həm İSESKO-ya üzv olan yeganə dövlət olmaq imkanından bəhrələnərək, Avropa ilə islam dünyası arasında mədəniyyət körpüsü rolunu oynamaq və iki sivilizasiya arasında mədəniyyətlərarası dialoqun inkişaf etdirilməsini nəzərdə tutan "Bakı prosesi"nin əsasını qoyaraq, Azərbaycanın beynəlxalq nüfuzunu daha da gücləndirməkdir. Buna görə Avropa Şurası rəsmiləri ilə aparılan fikir mübadiləsi zamanı Bakı prosesinin əhəmiyyəti xüsusi vurğulanmış və bildirilmişdir ki, bu təşəbbüs beynəlxalq səviyyədə məhz Bakıda keçiriləcək, Avropa Şurasına üzv dövlətlərin mədəniyyət nazirlərinin konfransında öz ilkin təsdiqini tapacaqdır. Beləliklə, bu tədbirlər həm islam, həm də Avropa mədəniyyətini özündə ehtiva edən Azərbaycan mədəniyyətinin beynəlxalq səviyyədə təşviq olunması, Azərbaycanın nüfuzunun yüksəldilməsi və beynəlxalq proseslərdə əhəmiyyətinin artırmaqla yanaşı, Azərbaycanın qitələrarası və sivilizasiyalararası əməkdaşlıq məsələlərində çox mühüm dövlət kimi qəbul olunmasına xidmət edəcəkdir. Mədəniyyət və Turizm Nazirliyində İSESKO nümayəndəsi Abdulilah ben Arafa həm Avropa Şurası-Azərbaycan işçi qrupunun üzvü kimi iştirak etmiş, həm də Bakının 2009-cu il üçün islam mədəniyyətinin paytaxtı elan olunması çərçivəsində həmin il ərzində keçiriləcək tədbirlərlə bağlı müzakirələr aparmışdır.

 

Səs.- 2008.- 12 iyul.- S. 12.