Kalininqradın baş kitabxanasında "Azərbaycan guşəsi" yaradılmışdır

AzərTAc Mədəniyyət və Turizm Nazirliyinə istinadla xəbər verir ki, qurumun təşəbbüsü ilə Azərbaycan Xalq Cümhuriyyətinin 90 illik yubileyi və 15 iyun - Milli Qurtuluş Gününün 15 illiyi münasibətilə Kalininqrad Vilayət Universal Elmi Kitabxanasında "Azərbaycan guşəsi" yaradılmışdır.
Bununla əlaqədar nazirlik tərəfindən kitabxanaya Azərbaycan xalqının ümummilli lideri Heydər Əliyev, Azərbaycan Xalq Cümhuriyyəti, Azərbaycanın tarixi, qədim dövlətçiliyi, iqtisadiyyatı, neft siyasəti, mədəniyyəti, incəsənəti, adət-ənənələri, Dağlıq Qarabağ problemi və s. haqqında kitab və elektron nəşrlər, lüğət və ensiklopediyalar, Azərbaycan dilini öyrənənlər üçün vəsaitlər göndərilmişdir.
Mayın 21-dən iyulun 23-dək həmin kitabxanada Azərbaycan kitablarının sərgisi keçirilmişdir. Sərginin açılışında Kalininqrad vilayətindəki Azərbaycanlıların Regional Milli-Mədəni Muxtariyyətinin rəhbəri Nadir Ağayev çıxış edərək mədəni əlaqələrin genişləndiriməsində belə tədbirlərin əhəmiyyətindən danışmışdır.
Sərgidə nümayiş etdirilən kitablar və elektron nəşrlər oxucuların böyük marağına səbəb olmuşdur.
Azərbaycan fondundakı kitab kolleksiyası daim zənginləşdiriləcəkdir.

Azərbaycan.- 2008.- 25 iyul.- S. 7.