Sevinc

 

Krım konfransının təəssüratları

 

Xəbər verdiyimiz kimi, iyunun 7-dən 15-dək respublikamızın nümayəndə heyəti "Krım -2008" beynəlxalq konfransında iştirak etmək üçün Sudak şəhərində olub. "Kitabxanalar və informasiya resursları müasir elm, mədəniyyət, təhsil və biznes aləmində" 15-ci Yubiley Beynəlxalq Konfrans və Sərgidə MDB ölkələri ilə yanaşı, Afrika, Asiya, Avropa ölkələrinin nümayəndələri də iştirak ediblər.

Respublikamızı təmsıl edən nümayəndə heyətinin tərkibində F.Köçərli adına Respublika Uşaq Kitabxanasının direktoru Fizurə Quliyeva da var idi. "Krım-2008" beynəlxalq kitabxana konfransının müxtəlif bölmələrində iştirak edən Fizurə xanım, bu konfransın çox maraqlı və yaddaqalan olduğunu vurğuladı: "Bu il ilk dəfə olaraq, "Krım-2008" konfransında iştirak etdim. Konfransda iştirak etmək mənim çoxdankı arzum idi. Düzdü, 1995-cı ildə Türkiyədə İFLA-nın 65-ci beynəlxalq konfransında iştirak etmışəm. Məlumat üçün deyim ki, həmin il biz İFLA konfransının üzvü seçildik. Bir il Türkiyə bizim üzvlük haqqımızı ödədi. İkinci üzvlük haqqını keçirə bilmədiyimizə görə, konfransda iştirak edə biimədik. Bir neçə il İFLA konfransında iştirakımıza fasilə verildi. Bildirim ki, İFLA Beynəlxalq Kitabxanalar Assosiasiyasının konfransı idi. Sonralar onlar bizlə əlaqə saxlasalar da, üzvlüq haqqını güzəştlə ödəməyi təklif etsələr də, bizim bu konfransın işinə qatılmağımız mümkün olmadı. Buna mən çox təəssüflənirdim.

"Krım-2008" konfransına gəlincə isə, bildirim ki, bu il o, konfransın 15 illiyini qeyd etdi. Konfransda müxtəlif dəyirmi masalar, debatlar, kitab təqdimatları oldu. 15 il ərzində hər il Krımın Sudak şəhərində keçirilən konfransda kitabxana, informasiya və kompyuter mütəxəssisləri, nəşriyyat nümayəndələri və bir sıra əlaqədar təşkilatlar toplaşıb zamanımızın aktual problemlərini müzakirə edirlər.

Bu il konfransın təntənəli açılışı oldu. Səhnəyə böyük formatda konfransın "Qızıl kitabı" qoyuldu, iştirakçı ölkələrin təbrikləri oxundu. Sonra sərginin açılışında iştirak edən nümayəndələrimiz nəşriyyatlar, kitabxana fəaliyyəti ilə bağlı müəssisələrlə tanış oldular, söhbətlər apardılar. Bir-birilərinə kitablar, disklər, bələdçilər hədiyyə etdilər. Konfrans bir neçə bölmədə fəaliyyət göstərdilər".

Fizurə xanım uşaq kitabxanasınm direktoru olduğu üçün çalışıb ki, uşaq və gənclər bölməsində iştirak etsin. Hər gün iki bölmədə iştirak edən F.Quliyeva bu bölmələrdə çox maraqlı mühazirələr, təqdimatlar olduğunu söylədi: "Biz konfransda ilk dəfə iştirak etdiyimizə görə çıxış etmədik. Çünki birinci il gələnlər, ancaq dinləyici kimi iştirak edirdilər. Növbəti dəfə konfransda iştirak etsəm, əminəm ki, çıxış da edəcəyik, təqdimat da keçirəcəyik. Donetskdən, Sverdlovskdən, Bryanskdən gələn nümayəndələrin çox maraqlı çıxışları oldu. Radio-nyan-yanın çıxışı isə xüsusi marağa səbəb oldu. O, konfransa kuklası ilə birlikdə gəlmişdi. Biz müntəzəm olaraq Moskvadan onların kasetlərini almışıq. Müxtəlif əsərlərin radio versiyasını - musiqili verilişlər hazırlayıblar. Çıxışdan sonra mən onunla görüşdüm və bildirdim ki, biz sizin yüzdən çox uşaq əsərinin radiolaşdırılmış versiyanızı almışıq. Çox təəssüflər olsun ki, bizdə rus oxucuları azalmağa başlayıb, əvvəllər çox maraqla qulaq asırdılar o kasetlərə. İndi uşaqlarda maraq azalıb. Biz bunun qarşısını almaq üçün çalışırıq".

Dağıstan Xasavyurt Mərkəzi Kitabxanasının direktoru Elnur Yakubovla Fizurə Quliyeva arasında "Məktəb və kitabxanaların əlaqəsi" adlı birgə layihə işləmək planlaşdırılıb. Birgə layihənin reallaşması yeni dərs ilində həyata keçəcəkdir. Bundan başqa müsahibim bildirdi: "Nəşriyyatlardan kitabxanalara: mütaliə dairəsinə təsir" adlı dəyirmi masada mütaliənin dünya səviyyəsində aşağı düşmə və bu problemin həlli yolları araşdırıldı. 2008-2016-cı illərdə bu problemin həlli ilə bağlı üç mərhələdə məruzə edən İ.Kuzmindən sonra bu bölmədə çox maraqlı çıxışlar oldu. Hətta Bryansk Mədəniyyət Şöbəsinin müdiri danışarkən heyrətlənməyə bilmirdik ki, mədəniyyət şöbəsinin müdiri kitabxanada görülən bütün işlərdən xəbərdardır. Hesab edirdin ki, bu elə kitabxananın direktorudur. Adamda təsəvvür yaranır ki, kitabxananın işinə o qədər yaxından kömək edir ki, bütün görülən işlərdən onun xəbəri var. Omsk Korlar Kitabxanası gözdən əlillər ilə apardıqları işi təqdim etdilər." Bu kitabxananın özəlliyi onda idi ki, korlar kompyuter vasitəsilə mütaliə edirdilər. Necə? Bu suala Füzurə xanım belə cavab verdi: "Gözdən əlil şəxs əlini kitaba sürtməklə kompyuterdə oxuyurdu. Maraqlı kitablar, onların tədbirləri, şair və yazıçılarla görüşləri kitabxananın elektron versiyasında yerləşdirilmişdi. Kor və zəif görənlər üçün belə işlərin görülməsi sevindiricidir. Çünki onlar özlərini cəmiyyətdən təcrid olunmuş hesab etmirlər".

Nümayəndələrimizin iştirak etdiyi bir tədbir daha yaddaqalan və orijinal olub. Bu tədbir daimi fəaliyyət göstərən TÜRKSOY-un "Türk dünyasının kitabxana və muzeyləri: qarşılıqlı əlaqə və əməkdaşlıq" seminarı çərçivəsində keçirilib. Seminarın əsas mövzusu "Bəkir Çobanzadə fenomeni və türk dünyası" idi. Akademik Bəkir Çobanzadənin heykəlinin açılışında və onun adına təsis olunmuş mükafatların təqdimat mərasimində iştirak edənlər Krım Muxtar Respublikasının Mərkəzi Elmi Kitabxanasında "Azərbaycan guşəsinin" təqdimat mərasimində də olublar. Daimi fəaliyyət göstərəcək bu guşədə Azərbaycanın tarixi, mədəniyyəti, milli-mədəni irsi, habelə müasir daxili və xarici siyasəti, neft strategiyası, Dağlıq Qarabağ problemi, Azərbaycan muğamları haqqında nəşrlər nümayiş etdirilib. Sevindirici haldır ki, Azərbaycan kitabxanaçılarının "Krım-2008" beynəlxalq konfransda iştirakı Təşkilat Komitəsi tərəfindən yüksək qiymətləndirilib.

 

Mədəniyyət.- 2008.- 3 iyul.- S. 4.