Azərbaycan-Latviya Hökumətlərarası Komissiyasının ikinci iclası keçirilmişdir

İqtisadi İnkişaf Nazirliyinin mətbuat xidmətindən AzərTAc-a bildirmişlər ki, Riqada iqtisadi, elmi-texniki və mədəni əməkdaşlıq üzrə Azərbaycan-Latviya Hökumətlərarası Komissiyasının ikinci iclası keçirilmişdir.

İclasda ölkəmizi komissiyanın həmsədri, İqtisadi İnkişaf naziri Heydər Babayevin rəhbərlik etdiyi nümayəndə heyəti təmsil etmişdir. Nümayəndə heyətinə bir sıra nazirliklərin, Milli Bankın yüksək vəzifəli rəsmiləri daxil idi. Latviya tərəfdən iqtisadiyyat naziri - Kaspars Gerhardsın rəhbərlik etdiyi komissiyada isə bu ölkənin müvafiq dövlət qurumları təmsil olunmuşdu.

İclasda komissiyanın həmsədrləri ölkələrinin iqtisadi vəziyyəti, qazanılmış uğurlar, biznes mühitinin daha da yaxşılaşdırılması ilə bağlı görülən tədbirlər və s. barədə məlumat vermişlər. Azərbaycan və Latviya arasında iqtisadi əlaqələrin mövcud vəziyyəti və iqtisadiyyatın müxtəlif sahələrində əməkdaşlığın inkişaf perspektivləri müzakirə olunmuş, komissiyanın birinci iclasının yekunlarına dair Protokolun icra vəziyyəti barədə fikir mübadiləsi aparılmışdır.

İclasın sonunda Hökumətlərarası Komissiyanın ikinci iclasının yekunlarına dair Protokol imzalanmışdır. Sənədi həmsədrlər - Heydər Babayev və Kaspars Gerhards imzalamışlar. Protokola əsasən, tərəflər ticarət-iqtisadi, sənaye və energetika, nəqliyyat, bank, mədəniyyət və turizm, təhsil, informasiya texnologiyaları sahələrində əməkdaşlığın inkişaf etdirilməsi, müqavilə-hüquq bazasının möhkəmləndirilməsi, habelə iş adamları arasında əlaqələrin təşviq olunması sahəsində əməkdaşlıq edəcəklər.

Sənəddə, həmçinin qarşılıqlı sərmayə yatırmaq imkanlarının araşdırılması, bu sahədə məlumat mübadiləsinin həyata keçirilməsi, işgüzar əlaqələrin daha da genişləndirilməsi məqsədi ilə biznes forumlarının, sərgilərin və yarmarkaların təşkil olunması öz əksini tapmışdır.

Səfər çərçivəsində nümayəndə heyəti Latviyanın Nəqliyyat naziri Alnars Şleserslə, Xarici işlər naziri Maris Riektinşlə, İstehlak Bazarına Nəzarət və Baytarlıq Təşkilatının, Parex Bankının rəhbərliyi ilə görüşmüşdür. Görüşlərdə ticarət, investisiyalar, maliyyə, bank və s. sahələrdə əməkdaşlıq imkanları müzakirə edilmişdir.

Azərbaycan nümayəndə heyəti Latviyanın süd məhsulları istehsal edən "Ricas Piena Kombinats" ilə də tanış olmuşdur.

Azərbaycan.- 2008.- 20 iyul.- S. 1.