Regionlarda yeni texnologiyaların tətbiqi səmərəli nətijələrini verir

Prezident İlham Əliyev cənabları tərəfindən təsdiq olunmuş “Azərbaycan Respublikasında rabitə və informasiya texnologiyalarının inkişafı üzrə 2005-2008-ci illər üçün Dövlət Proqramı” na uyğun olaraq Rabitə və İnformasiya Texnologiyaları Nazirliyi tərəfindən hazırlanmış tədbirlər proqramına əsasən regionlarda informasiya və kommunikasiya texnologiyaları sürətlə inkişaf edir. Bununla yanaşı “Telekommunikasiya haqqında” Azərbaycan Respublikası Qanununun tətbiqi ilə əlaqədar respublika ərazisində universal telekommunikasiya xidmətlərinin təşkili mərhələləri müəyyən edilərək müvafiq layihənin həyata keçirilməsinə də start verilmişdir. Bu layihələrin başa çatdırılması ilə regionlarda mövcud rabitə şəbəkəsinin tam elektronlaşdırılması təmin olunmaqla yanaşı, yeni nəsil rabitə xidmətlərinin göstərilməsi də reallaşır.

Regionlarda telekommunikasiya şəbəkələrinin rekonstruksiyası ilə əlaqədar tətbiq olunan yeni texnika və texnologiyalar təqdim olunan rabitə xidmətlərinin çeşidini əhəmiyyətli dərəcədə artırmışdır.

Belə ki, “Aztelekom” İstehsalat Birliyinin telekommunikasiya şəbəkəsinin 72,8 faizdən çox hissəsi elektron ATS-lərlə təmin olunmuşdur. Qeyd edək ki, elektron ATS-lərin abunəçiləri müxtəlif servis xidmətlərindən istifadə imkanına malikdirlər. Eyni zamanda “Aztelekom. net” internet xidmətləri şəbəkəsi regionlarda internetin inkişafına güclü təkan vermiş, istifadəçilərin ən sürətli şəkildə qlobal şəbəkəyə qoşulması imkanlığı təmin olunmuşdur. Kəndlərin mərkəzlə birləşdirici xətlərinin optik kabellərlə əvəzlənməsi abunəçilərin telefon rabitəsi ilə yanaşı digər multimedia xidmətlərindən istifadə etmə imkanlarını artırmışdır.

Regionlarda NGN şəbəkəsinin qurulması istiqamətində pilot layihə kimi “Elektron Şamaxı” layihəsinin başa çatdırılması və bununla da Şamaxı rayon mərkəzində və kəndlərdə ən müasir tələblərə cavab verən rabitə şəbəkəsi qurulması ilə bu tendensiya davam etdirilməyə başladı. Xatırladaq ki, digər regionlarda da bu şəbəkənin qurulması məqsədilə uyğun işlər aparılır. Xatırladaq ki, bu şəbəkə vasitəsilə ənənəvi rabitə xidmətləri ilə yanaşı İP TV, İP telefon, “Triply play” və s. multimedia xidmətlərinin və informasiya texnologiyalarının ən son yeniliklərini dəstəkləyən digər xidmətlərin göstərilməsi imkanlığı təmin olunmuşdur.

Bu siyahıya kartlarla qoşulma, parolsuz qoşulma ilə yanaşı, sürətli internet - ayrılmış xətlərin təşkili və genişzolaqlı şəbəkə xidmətləri də daxildir ki, bu xidmətlər həm adi istifadəçilərin, həm də korporativ müştərilərin tələblərini tam ödəməklə bu sahədə onların maraqlarını təmin edir.

Rabitə dünyası.- 2008.- 3 iyul.- S. 6.