Ulyanovskda Heydər Əliyev adına bağ açılmışdır

Azərbaycanın ümummilli liderinin şərəfinə salınmış bağ şəhərin Zasviyajsk rayonundakı Jiqulyovsk və Fruktovaya küçələrinin kəsişməsində yerləşir və yerli Azərbaycan diasporunun nümayəndələri tərəfindən abadlaşdırılmışdır.

Ulu öndərin bağın mərkəzində ucaldılmış abidəsinin müəllifi Moskvada Yuri Qaqarinin abidəsinin müəlliflərindən biri olan tanınmış heykəltəraş Sergey Bobrakovdur. Təntənəli açılış mərasimi yaxın günlərdə olacaq. Abidənin qoyulması barədə qərarı Ulyanovsk meri Sergey Yermakov 2008-ci ilin fevralında imzalamışdır.
Abidə və bağ ulyanovsklıların Azərbaycan liderinə hörmətinin əlamətidir. Ulyanovsk vilayətinin qubernatoru Sergey Morozovun sözlərinə görə, Heydər Əliyevin xatirəsinin əbədiləşdirilməsi Rusiya və Azərbaycan xalqları arasında dostluq və əməkdaşlığın möhkəmlənməsində və inkişafında mühüm rol oynayacaqdır.
Heydər Əliyev Ulyanovskda dəfələrlə olmuş, 1983-cü ildə isə "Aleksandr Suvorov" teploxodunun qəzaya uğramasının nəticələrinin aradan qaldırılması üzrə Dövlət Komissiyasının sədri qismində buraya gəlmişdir. Keçmiş Sovet İttifaqının ali rəhbərliyində təmsil olunmuş Heydər Əliyev faciə ilə bağlı çoxsaylı problemlərin həlli üçün qısa müddətdə tədbirlər görmüşdür.

Azərbaycan.- 2008.- 22 iyun.- S. 3.