Şamilqızı Ü.

Ağstafada tarixi abidənin təmirə ehtiyacı var

Ağstafa rayonunun Qıraq Kəsəmənli kəndində xeyriyyəçi kimi tanınan və dövlətin qoruduğu tarixi abidələr sırasında olan 1910-cu ildə tikilmiş İsrafil Ağanın evi uçmaq təhlükəsindədir. XX əsrin əvvəllərində inşa olunan, kəndin simvolu sayılan bu tarixi abidədə artıq aşınma və tavanın çökməsi halları müşahidə olunur. Bu tarixi mülk kənd sakinlərinin səyi nəticəsində bu günə qədər qorunub saxlanıb. Kənd sakini Qədir İsgəndərov bildirib ki, İsrafil Ağa 1870-ci ildə Qıraq Kəsəmən kəndində anadan olub. Onun sözlərinə görə, İsrafil Ağanın kəndə, obaya böyük köməyi dəyib: "Əvvəllər evin ətrafında yaşıllıq salmışdıq, vaxtında su çatdırmadıq, əkdiyimiz ağaclar qurudu. İndi baxımsızlıq ucbatından hər gələn buradan nəyisə söküb aparır, bir tərəfini külək dağıdır. Hər halda biz abidəni qoruyub saxlamağa çalışırıq. Bu bizim qədimdən qalan tarixi abidəmizdir, biz İsrafil Ağayla fəxr edirik".
İsrafil Ağanın evində 1980-ci ildə rayonun daxili imkanları hesabına yerli ustalar tərəfindən kosmetik təmir işləri aparılıb. Lakin sonralar bina baxımsızlıq ucbatından tamamilə yarasız hala düşüb. Ağstafa rayon Mədəniyyət və Turizm idarəsinin rəisi Gülgün Kərimov qeyd edib ki, tarixi abidə olan bu binanın təmirində mütəxəssislərin iştirak etməsi çox vacibdir: "Bina uzun illərdir təmir olunmadığından, külək, yağan yağışın təsiri nəticəsində erroziyaya uğrayıb. Ancaq onu da nəzərinizə çatdırım ki, İsrafil Ağanın evinin təmir olunması işləri artıq Mədəniyyət və Turizm Nazirliyi tərəfindən reallaşdırılır. Bu işə 2009-2012-ci illər ərzində nəzarət olunacaq".
Gülgün Kərimov həmçinin vurğulayıb ki, XIX əsrə aid məscid uçmaq təhlükəsindədir: "Bundan başqa bu ərazidə yerləşən, XIX əsrdən yadigar qalan məscid tamamilə dağılıb. Tarixi abidə olan bu məscidin bərpa edilməsi əvəzinə yenisinin tikilməsi daha məqsədəuyğun olar". Bu nə qədər qəribə olsa da Ağstafa rayon Mədəniyyət İdarəsinin rəisi dövlətin maddi-mədəniyyət abidəsi kimi qoruyub saxladığı məscidi artıq ömrünü yaşamış bir obyekt hesab edir. Hazırda Ağstafa rayonunda 52 tarixi abidə var, hansı ki, bunlardan ikisi dünya, 36-sı ölkə, 14-ü isə yerli əhəmiyyətli hesab zlunur.

Xalq cəbhəsi.- 2008.- 13 iyun.- S. 13.