Hər il Azərbaycana gələn turistlərin sayı 10-11 faiz artır

Təkcə ötən il ölkəmizə 1 milyon 326 min xarici ölkə vətəndaşı gəlib.

Bu barədə jurnalistlərə məlumat verən Mədəniyyət və Turizm Nazirliyinin şöbə müdiri Aydın İsmiyevin sözlərinə görə, keçən il Azərbaycana səfər etmiş xarici ölkə vətəndaşlarının 1 miyondan çoxu turist olub. Bu il onların sayının artacağı gözlənilir.
A.İsmiyev həmçinin bildirib ki, turistlər əsasən Bakı, Şəki-Zaqatala və Quba-Nabran bölgələrinə səfər edirlər ki, bu da həmin ərazilərdə mehmanxana şəbəkəsinin geniş olması ilə bağlıdır. Ölkəmizə gələn turistlərin əksəriyyəti İran İslam Respublikası, Rusiya, Gürcüstan və Avropadandır. Amma son iki ildə Yaponiya, Çin və Koreyadan gələn turistlərin də sayı artmağa başlayıb.
Şöbə müdirinin sözlərinə görə, Azərbaycanda turizm 2001-ci ildən - xarici investorların ölkəmizin bu sektoruna sərmayə qoymağa maraq göstərməsindən sonra başlayıb. "Artıq Səudiyyə Ərəbistanı və Küveyt investorları ilə danışıqlar aparılıb. Yəqin ki, yaxın illərdə yeni layihələr həyata keçiriləcək" - deyə A.İsmiyev söyləyib.

Azərbaycan.- 2008.- 18 iyun.- S. 11.