İstanbulun Aya Sofiya muzeyində azərbaycanlı rəssamların sərgisi açılmışdır

İyunun 25-də Azərbaycanın İstanbuldakı baş konsulluğunun təşkilatçılığı ilə dünyanın ən tanınmış muzeylərindən olan Aya Sofiyada Türkiyədə yaşayan azərbaycanlı rəssamların əsərlərindən ibarət sərgi açılmışdır. Sərgi Azərbaycan Demokratik Respublikasının 90 illik yubileyinə həsr olunmuşdur.

Açılışda ölkəmizin İstanbuldakı baş konsulu Səyyad Salahlı, xarici ölkələrin diplomatik korpuslarının rəhbərləri, həmvətənlərimiz, İstanbul valiliyi və bələdiyyəsinin rəhbərləri iştirak etmişlər.

Mərasim iştirakçılarına məxsusi olaraq Bakıdan gətirilmiş milli şirniyyatlarımızın nümunələri - şəkərbura, paxlava, şərbətlər paylanmışdır.

Sərgi-muzeyə gələn əcnəbi turistlərin böyük marağına səbəb olmuşdur.

Həmin gün axşam isə aktyor və rejissor Cahangir Zeynalovun rəhbərlik etdiyi Adana Teatrının tamaşası olmuşdur.

Respublika.- 2008.- 26 iyun.- S. 10.