2008 ci il Avropada mədəniyyətlərarası dialoq ilidir

 

Fransa Respublikasının Paris, Strasburq və Belçika Krallığının Brüssel şəhərlərində yerləşən YUNESKO, Avropa Şurası və Avropa Birliyinin qərargahlarında Azərbaycan Xalq Cümhuriyyətinin 90 illik yubileyinə həsr olunmuş uşaq konsertləri və kiçik rəssamların əsərlərindən ibarət sərgilər təşkil edilmişdir. Bu konsertlərdə Dövlət Uşaq və Gənclər Simfonik Orkestri, Uşaq Xor Kapellası, Bakı Xoreoqrafiya Məktəbinin şagirdləri, respublikanın müxtəlif musiqi və incəsənət məktəblərində təhsil alan kiçik musiqiçilər böyük uğurla çıxış etmişlər.İlk konsert və sərgi 2008-ci il mayın 20-dən başlayaraq YUNESKO-nun Fransa Respublikasının Paris şəhərində yerləşən qərargahında keçirilmişdir. YUNESKO-nun Xoşməramlı Səfirlərinin 8-ci hesabat yığıncağında iştirakla əlaqədar Parisdə səfərdə olan YUNESKO və İSESKO-nun xoşməramlı səfiri, Heydər Əliyev Fondunun və Azərbaycan Mədəniyyətinin Dostları Fondunun prezidenti, millət vəkili, Azərbaycan Respublikasının birinci xanımı Mehriban Əliyeva və YUNESKO-nun baş direktoru cənab Koiçiro Matsuura konsertdən əvvəl çıxış etmişlər. Konsertdə İordaniyada Haşimilər və Niderland krallıqlarının birinci xanımları və digər xoşməramlı səfirlər iştirak etmişlər. Növbəti iki konsert Fransa Respublikasının Strasburq şəhərində keçirilmişdir. 2008-ci il mayın 22-də Avropanın ən möhtəşəm kilsələrindən biri olan Strasburq Kafedralında azərbaycanlı uşaqların konserti təşkil edilmişdir. Konsertdən əvvəl kafedralın kardinalı çıxış edərək azərbaycanlı qonaqları salamlamışdır. Məlum olduğu kimi, 2008-ci il Avropada mədəniyyətlərarası dialoq ili elan edilmişdir. Kafedralda təşkil edilən konsert Azərbaycanın bu prosesdə fəal iştirakını nümayiş etdirməklə müxtəlif mədəniyyətlərin və dinlərin bir-birinə yaxınlaşması işinə bir töhfə olmuşdur. Strasburq Kafedralında konsert keçirilməsinə müstəsna hallarda icazə verildiyini və müsəlman ölkəsinin nümayəndələrinin ilk dəfə olaraq burada çıxış etdiyini nəzərə alsaq, bu tədbirin nə dərəcə əhəmiyyət kəsb etdiyi aydın olar. Növbəti günlərdə isə Strasburq şəhərində Avropa Şurasının Nazirlər Komitəsinin foyesində azərbaycanlı uşaqların rəsm əsərlərindən ibarət sərgi və Uşaq Xor Kapellasının konserti təşkil edilmişdir. Sərginin açılışında Azərbaycan Milli Məclisinin sədri Oqtay Əsədov, Türkiyə Böyük Millət Məclisinin sədri Köksal Toptan, Fransa Senatının sədri Kristian Ponsöle, Albaniya, Moldova, Monako parlamentlərinin sədrləri, Almaniya Bundestaqının sədr müavini və onu müşayiət edən nümayəndə heyəti iştirak etmişlər. Həmin gün Strasburqun "Palais de la Musique et des Congres" sarayında da azərbaycanlı uşaqların iştirakı ilə böyük bir konsert keçirilmişdir. Strasburqda ilk dəfə olaraq belə yüksək səviyyədə təşkil edilən tədbirlərdə Azərbaycan Respublikası Milli Məclisinin sədri Oqtay Əsədov və onu müşayiət edən nümayəndə heyəti, Avropa Şurası Parlament Assosiasiyasının sədri Luiz Maria de Puç, Avropa Şurasının baş katibinin müavini Mod de Bur Bukikio, Avropa Şurasının Mədəniyyət, təhsil, gənclər və idman üzrə baş direktoru Qabriella Battaini-Draqoni, təşkilata üzv ölkələrin səfirləri və qurumun digər yüksək vəzifəli nümayəndələri iştirak etmişlər. Fransaya səfər çərçivəsində "Luvr Muzeyi və Azərbaycan Respublikasının Mədəniyyət və Turizm Nazirliyi arasında əməkdaşlıq üzrə Razılıq Protokolunun" layihəsi, habelə, dahi Azərbaycan bəstəkarı Qara Qarayevin 90 illik yubileyi ilə əlaqədar Luvr Muzeyində konsertin təşkil edilməsi barədə muzey rəhbərliyi ilə danışıqlar aparılmışdır. Avropa Birliyi ilə ölkəmiz arasında əməkdaşlığı inkişaf etdirmək, Azərbaycan mədəniyyəti və incəsənətini təbliğ etmək məqsədilə mayın 28-də Avropanın siyasi mərkəzi sayılan Brüssel şəhərinin ən möhtəşəm konsert salonunda -"Theatre de Wolubilis"də azərbaycanlı uşaqların konserti təşkil edilmiş, foyedə kiçik rəssamların əsərləri nümayiş etdirilmişdir. Qeyd etmək lazımdır ki, Azərbaycan Xalq Cümhuriyyətinin 90 illik yubileyi münasibətilə Fransa Respublikasında və Belçika Krallığında keçirilmiş bütün bu tədbirlər ölkəmizin YUNESKO, Avropa Şurası və Avropa Birliyi yanında daimi nümayəndəliklərinin fəal iştirakı ilə təşkil edilmişdir. Uşaq konsertləri və rəsm sərgilərinin yüksək səviyyədə hazırlanması və keçirilməsi, uşaq kollektivlərinin və kiçik solistlərin ifaçılıq məharəti tamaşaçıları valeh etmiş və böyük əks-səda doğurmuşdur. Sözügedən tədbirlərdə YUNESKO, Avropa Şurası, Avropa Birliyi və Azərbaycan Respublikasının yüksək vəzifəli şəxsləri, müvafiq təşkilatlar yanında ölkəmizin daimi nümayəndələri, diplomatik korpus üzvləri, respublikamızın həmin ölkələrdə fəaliyyət göstərən diaspora nümayəndələri iştirak etmiş, tədbirlər dünyanın müxtəlif kütləvi informasiya vasitələri tərəfindən geniş işıqlandırılmışdır.
   

Səs.- 2008.- 5 iyun.- S. 12.