Kinematoqraf və dünya bazarı bir nömrəli problemdir

İyunun 2-də "Abşeron" mehmanxanasında "Şərq-Qərb" X Beynəlxalq kinofestivalı çərçivəsində "Milli kinematoqrafiyalar və kinoprokat: problemlər və perspektivlər" mövzusunda "dəyirmi masa" keçirilmişdir.

"Dəyirmi masa"nı festivalın prezidenti Rüstəm İbrahimbəyov açmışdır. Onun fikrincə, çəkilən çoxsaylı filmlərdən bir qisminin, bəzən orta səviyyəli filmlərin dünya bazarına çıxması və gəlir gətirməsi, digərlərinin isə kölgədə qalması sualına birmənalı cavab tapmaq çətindir. Bütün cavab variantları məqbul olsa da, hələ bir nəticəyə gəlinməmişdir.

Polşa rejissoru Kşiştof Zanussi bildirmişdir ki, son vaxtlar insanların kinematoqraf üçün boş vaxtı qalmır. O demişdir: "Əgər insan mənim filmimə baxıbsa, başqa filmə baxmağa nə vaxtı, nə də qüvvəsi qalmır. Etiraf etməliyik ki, bu, bir nömrəli problemdir. İkinci problem də elə birincidən doğur: tamaşaçı yalnız büdcəsi çox olan filmlərə baxmağa üstünlük verir, çünki qəpik-quruşa çəkilən filmə baxmağa vaxt itirmək istəmir. Təəssüf ki, bütün dünyada belədir".

Onun sözlərinə görə, filmin dünya bazarına çıxarılması problemi hamının problemidir. Yüz filmdən yalnız bəzilərinin taleyi uğurlu olur və bu problem bütün Avropaya aiddir. Sivilizasiyalar bir-birini əvəz etsə də, bu, dünya kinematoqrafında yaranmış vəziyyətə təsir etməyəcəkdir.

Diskussiyada kinorejissorlar Pavel Çuxray, Ernest Abdıjaparov və başqaları iştirak etmişlər.

Respublika.- 2008.- 3 iyun.- S. 3.