"Şərq-Qərb" kinofestivalı yekunlaşıb

Paytaxt sakinləri 7 gün ərzində 16 filmi izləmək imkanı əldə ediblər

İyun ayının 1-də işinə start verən onuncu "Şərq-Qərb" Bakı Beynəlxalq kinofestivalı yekunlaşıb. Festival çərçivəsində paytaxt sakinləri 7 gün ərzində 16 filmi izləmək imkanı əldə ediblər.

Zəif təşkilati məsələlərə əlavə olaraq, bu dəfə də festivalın coğrafiyası Azərbaycan da daxil olmaqla cəmi 8 ölkə ilə kifayətlənməli olub. Fransa, Rusiya, Estoniya, İran, Polşa, Latviyada istehsal edilmiş filmlərlə birlikdə festivalda iki Azərbaycan filmi də nümayiş etdirilib. 16 filmi 7 gün ərzində 3000 tamaşaçı izləyib.

Musiqili Komediya Teatrında baş tutmuş açılış mərasimindən sonra filmlər Azərbaycan Kinematoqrafçılar İttifaqının zalında və "Azərbaycan" kinoteatrında ictimaiyyətə təqdim edilib.

Bu il "Ən parlaq debüt" nominasiyası Rusiya istehsalı olan "Aleksandr Nevski" filminin rejissoru İqor Kalyonova, "Kişilik rəmzini tərənnüm edən ən yaxşı obraz" nominasiyası "Hökmdarın taleyi" ekran əsərindəki roluna görə Azərbaycanın Xalq artisti Fəxrəddin Manafova, "Qadınlıq rəmzini tərənnüm edən ən yaxşı obraz" qırğızıstanlı gənc aktrisa Aseda Totabekovaya, "Bəşəriyyətə ən humanist göndəriş" nominasiyası isə iranlı rejissor Puran Derəxşəndiyə qismət olub.

Maliyyə çatışmazlığı səbəbindən Beynəlxalq "Şərq-Qərb" Bakı kinofestivalı adında əks olunan qitələrin kino aləmini işıqlandıra biləcək səviyyədə keçirilmir. Bunun səbəbini Kinematoqrafçılar İttifaqının katibi Abbas Əliyev Qazaxıstan, Rusiya və digər dövlətlərdə keçirilən sanballı festivallara milyonlarla dollar sərf olunmasında görür. Təkcə məşhur kino xadimlərinin dəvət olunması böyük məbləğ tələb edir. Abbas Əliyevin sözlərinə görə, hökumət keçən il festivala 112 min manat ayırmışdısa, bu il 150 min manat ayırıb: "Yenə də festivalı geniş formatda keçirmək üçün kifayət deyil".

Qeyd edək ki, artıq 61 dəfə baş tutmuş Kann kinofestivalının təşkilinə 7 milyon, Venesiya festivalına 5 milyon 200 min, Soçidə keçirilən Kinotavr festivalına isə 2 milyon ABŞ dolları vəsait ayrılıb.

Şərq.- 2008.- 10 iyun.- S. 14.